Gomti Nagar Harassment Case Video Viral : लखनऊच्या गोमती नगर भागात नुकतीच पावसाचे पाणी उडवून महिलेची छेड काढल्याचा धक्कादायक प्रकार घडला होता. या घटनेचा व्हिडिओ सोशल मीडियावर व्हायरल झाला. पावसाच्या साचलेल्या पाण्यातून बाईक किंवा कारमधून येणाऱ्या जाणाऱ्या नागरिकांवर पाणी उडवून काही तरुणांच्या जमावाने त्रास दिल्याचे अनेक व्हिडिओ समोर आले आहे. दरम्यान आता या तरुणांना चोप देणाऱ्या पोलिसांचा व्हिडिओ सोशल मीडियावर चर्चेत आला आहे. व्हायरल व्हिडिओ पाहून नेटकऱ्यांना प्रचंड धक्का बसला आहे. आपल्या देशातील तरुणाई कोणत्या दिशेने चालली आहे असा चिंता अनेकांना व्यक्त केली. अनेकांनी या घटनेचा निषेध करत आपला रोष व्यक्त केला.
जमावाने नागरिकांच्या अंगावर उडवले पाणी
या घटनेचा आणखी एक व्हिडीओ व्हायरल झाला आहे ज्यामध्ये काही तरुणांना ताज हॉटेल ब्रिजच्या खाली दुचाकी ओलांडताना दिसत असताना ते गुडघाभर पाण्यात पाण्यात ये-जा करणाऱ्यांना अडवून त्यांच्या अंगावर पाणी उडवतात. व्हिडिओ व्हायरल झाल्यानंतर उत्तर प्रदेश पोलिसांनी तातडीने कारवाई केली. पोलिसांनी घटनास्थळी जाऊन केलेल्या कारवाईचा व्हिडिओ चर्चेत आला आहे.
हेही वाचा – Video: भयावह! भरदिवसा तरुणांच्या जमावाने काढली महिलेची छेड; अंगावर उडवले पाणी, दुचाकी ओढून पाण्यात पाडले
पोलिसांनी केली तरुणांवर कारवाई
पोलिस घटनास्थळी पोहचताच तरुणांनी तेथून पळ काढला. काही तरुणांना पकडून पोलिसांनी चांगला चोप दिला. दरम्यान या प्रकरणात मोहम्मद अरबाज आणि विराज साहू या इतर दोघांना ताब्यात घेण्यात आले होते. त्यानंतर या गुरुवारी आणखी १२ जणांना अटक केली. या प्रकरणात अटक करण्यात आलेल्यांची एकूण संख्या १६ झाली आहे. यापूर्वी पवन यादव आणि सुनील यादव यांना पोलिसांनी अटक केली होती
लखनऊच्या पोलिस उपायुक्त रवीना त्यागी यांनी सांगितले की, “घटनेची माहिती मिळाल्यानंतर पोलिसांनी गुन्हेगारांची ओळख पटवण्यासाठी फुटेजचे पाहण्यास सुरुवात केली. योग्य आरोपांखाली गुन्हा दाखल करण्यात आला आणि आरोपींची ओळख पटवण्यासाठी तीन पोलिस पथके तयार करण्यात आली.”
हेही वाचा – वृद्धाचे संतापजनक कृत्य! दुकानात खरेदी करणाऱ्या महिलेबरोबर घडली धक्कादायक घटना, Video Viral
युपीचे मुख्यमंत्री योगी आदित्यनाथ यांनी महिलांच्या सुरक्षेसाठी राज्य कटिबद्ध असल्याचे सांगून या प्रकरणात जलद न्याय देण्याचे आश्वासन दिल्यानंतर हे झाले आहे. मुख्यमंत्री आदित्यनाथ यांच्या निर्देशानुसार डीसीपी, एडीसीपी आणि एसीपी यांना हटवण्यात आले आहे, तर एसएचओ गोमतीनगर आणि पोलीस चौकी प्रभारी यांना निलंबित करण्यात आले आहे.
