सोशल मीडियाच्या जगात वावरताना अनेकांना आपले सुंदर फोटो शेअर करण्याची सवय असते. त्यामुळे सुंदर दिसण्यासाठी कॉस्मेटिक आणि प्लास्टिक सर्जरी करण्याकडे कल दिसून आला आहे. मात्र या कॉस्मेटिक सर्जरीचे काही धक्कादायक प्रकार समोर आले आहेत. असंच काहीसं बुल्गारियात राहणाऱ्या एंड्रिया हिच्यासोबत झालं आहे. एंड्रियाने आपल्या ओठांचा आकार वाढवण्यासाठी २७ इंजेक्शन घेतले. आता जगातील सर्वात मोठे ओठ असल्याचा दावा एंड्रियाने केला आहे. स्वत:ला बार्बी डॉल संबोधणाऱ्या एंड्रियाने आतापर्यंत जवळपास ५ लाख रुपये खर्च केला आहेत. मात्र अजूनही तिचं समाधान झालेलं नाही. अजून मोठे ओठ करून तिला विश्वविक्रम प्रस्थापित करायचा आहे. त्याचबरोबर तिला आपल्या चेहऱ्याची लांबी देखील वाढवायची आहे.
प्लास्टिक बार्बी डॉलसारखं दिसण्याचं एंड्रियाचं स्वप्न आहे. यासाठी ती प्लास्टिक सर्जरी करण्यासही तयार आहे. ओठ मोठे झाल्याने तिचा आत्मविश्वास देखील वाढला आहे. त्याचबरोबर इन्स्टाग्रामवर फॉलोवर्सची संख्याही वाढली आहे.
एंड्रियाने आतापर्यंत २७ इंजेक्शन फक्त ओठांवर घेतले आहेत. यात एका इंजेक्शनची किंमत जवळपास २० हजार रुपये आहे. एंड्रियाचा फोटो पाहून अनेकांनी तिला सर्जरी न करण्याचा सल्ला देखील दिला आहे. मात्र स्वत:च्या प्रेमात असलेल्या एंड्रियाला याचं काही देणंघेणं नाही.
