Viral Liquor Shop Poster: आताच्या काळात सोशल मीडियावर काय व्हायरल होईल याचा अंदाज नाही. पण, कधी कधी या व्हायरल गोष्टींमुळे अनेक मजेशीर वाटणाऱ्या गोष्टींना गंभीर रूपदेखील असतं याची जाणीव होते. आपण रस्त्यावर जाहिरातींचे अनेक पोस्टर्स पाहतो; पण काही विशिष्ट पोस्टर्स आपल्याला अगदी आवर्जून लक्षात राहतात. त्यामागचं कारणही तसंच असतं. आता अशाच एका जाहिरातीच्या पोस्टरने सगळ्यांचं लक्ष वेधून घेतलंय.
मध्य प्रदेशातील बुरहानपूर येथील दारूच्या दुकानाजवळील एक पोस्टर सध्या सोशल मीडियावर तुफान व्हायरल होतंय. या पोस्टरनं सगळ्यांचं लक्ष वेधून घेतलंय तसंच त्यावर टीकाही झाली आहे. नेमकं या पोस्टरवर असं आहे तरी काय? जाणून घेऊ.
व्हायरल पोस्टर (Viral Liquor Shop Poster)
व्हायरल झालेल्या या पोस्टरवर ‘ठेका’कडे (दारूच्या दुकानाकडे) बाण दाखवत, दुकानात जाऊन इंग्रजी बोलायला शिकाल, असा सल्ला दिला आहे. “दिन दहाडे इंग्लीश बोलना सीखे” म्हणजेच (दिवसाढवळ्या इंग्रजी बोलण्यास शिका), असं या पोस्टरवर लिहिलं गेलं आहे.
असं बोललं जातं की, दारूच्या प्रभावाखाली असताना विशेषतः भारतात लोकं इंग्रजीमध्ये बोलायाला लागतात. अधिक ग्राहकांना आकर्षित करण्यासाठी अशा प्रकारे मार्केटिंग स्ट्रॅटेजी म्हणून वापरून लोकांना भुलवण्याचा हा एक प्रयत्न आहे. हे व्हायरल पोस्टर मात्र स्थानिक लोकांमध्ये, विशेषतः विद्यार्थी आणि तरुणांमध्ये चर्चेचा विषय ठरला आहे.
सिद्धार्थ कुमार या स्थानिक महाविद्यालयीन विद्यार्थ्यानं या व्हायरल झालेल्या पोस्टरवर जोरदार टीका केली आणि सांगितलं की, याचा विद्यार्थ्यांवर नकारात्मक परिणाम होऊ शकतो. सिद्धार्थने इतर विद्यार्थ्यांसह, ते पोस्टर काढून टाकण्याची मागणी केली आणि या पोस्टरसाठी जबाबदार असलेल्यांवर कठोर कारवाईची मागणीदेखील केली.
“अशा प्रकारच्या पोस्टर्सचा परिसरातील विद्यार्थी आणि तरुणांवर विपरीत परिणाम होईल. हे पोस्टर कोणी लावले हे प्रशासनाने शोधून त्या व्यक्तीवर कडक कारवाई करावी, अशी आमची इच्छा आहे. पोस्टर तत्काळ उतरवण्यात यावं,” असं सिद्धार्थचं म्हणाणं आहे.
हेही वाचा… शिवीगाळ केली अन्…., बिहारमधील ट्रेनमध्ये एका सीटसाठी महिलेने ओलांडली मर्यादा; VIDEO पाहून व्हाल थक्क
दारू प्यायल्यानंतर लोक इंग्रजी बोलायला शिकतील, असा संदेश या पोस्टमधून देण्यात आला आहे, जे चुकीचे आहे. तसेच, पोस्टरवर झटकन एक नजर टाकल्यास ते एखाद्या स्पोकन इंग्लिश कोचिंग सेंटरच्या जाहिरातीसारखं दिसतं,” असंही तो म्हणाला.
स्थानिकांच्या संतापाची दखल घेत जिल्हाधिकारी भाव्या मित्तल यांनी तत्काळ उत्पादन शुल्क विभागाला पोस्टर लावणाऱ्यांवर कारवाई करण्याचे निर्देश दिले.
© IE Online Media Services (P) Ltd
