Chennai Temple iPhone Case : मंदिरात देवदर्शनाला गेल्यावर प्रत्येकजण आप-आपल्या श्रद्धेनुसार दान करत असतो, दान पेटीत काहीना काही टाकत असतो. काहीजण पैसे टाकतात तर काहीजण सोने-चांदीसुद्धा दान करतात. यानंतर आपण जे देवाला अर्पण केलं ते देवाचं झालं असं म्हणतात. पण विचार करा या दानपेटीत तुमची एखादी मौल्यवान वस्तू चुकून पडली तर… तामिळनाडूमधील एका भाविकासोबत असंच घडलं. त्याचा आयफोन चुकून दानपेटीत पडला आणि तो देवाचा झाला म्हणत मंदिर प्रशासनाने देण्यास नकार दिला.
नेमकं काय घडलं?
चेन्नईतील थिरुपुरुरच्या अरुलमिगु कंदस्वामी मंदिरातील ही घटना. विनायगपुरमधील हा भाविक ज्याचं नाव दिनेश आहे. एका भाविकाचा आयफोन चुकून दानपेटीत पडला आणि तो मंदिराची संपत्ती बनला. एक महिन्यापूर्वी तो आपल्या कुटुंबासह मंदिरात गेला होता. देवाची पूजा केल्यानंतर त्याने हुंडी म्हणजे दानपेटीत काही पैसा टाकायला गेला. त्याने सांगितलं जेव्हा तो आपल्या शर्टच्या खिशातील पैसे काढत होता. तेव्हा आयफोन चुकून दानपेटीत पडला. ही हुंडी म्हणजे दक्षिणेकडील मंदिरांमध्ये असणारी दानपेटी बरीच उंचावर असून त्यावर लोखंडी जाळीसुद्धा होती. ज्यामुळं दिनेश यांना त्यातून फोन काढता आला नाही.
‘आता तो देवाचा’
आपला फोन बाहेर काढणं अशक्य असल्याचं लक्षात येताच त्यांनी तातडीने मंदिर व्यवस्थापनाशी संपर्क साधला पण तिथं त्यांना समाधानकारक उत्तर मिळालं नाही. जी वस्तू दानपेटीमध्ये टाकली जाते ती देवाचीच होऊन जाते आणि ती परत केली जात नाही. परंपरेनुसार हुंडी दोन महिन्यांतून एकदाच उघडली जाते, असं व्यवस्थापनाकडून त्यांना सांगण्यात आलं. दिनेशने हिंदी आणि धार्मिक संस्थेच्या अधिकाऱ्यांकडे तक्रार केली. तेव्हा दानपेटी कधी उघडणार हे सांगितलं. अखेर शुक्रवारी हुंडी उघडण्यात आली. याची माहिती मिळताच दिनेश तिथं पोहोचला. पण मंदिर प्रशासनाने तो आयफोन आता मंदिराची संपत्ती असल्याचं सांगत फोन देण्याऐवजी सिम कार्ड आणि फोनमधील महत्त्वाचा डेटा डाऊनलोड करण्याचा पर्याय दिला.
तसेच शेवटी हीच घटना कोणा दुसऱ्यासोबत घडली असती तरीही इथंही तसाच न्याय लागू असता असं स्पष्टीकरण मंदिरातून देण्यात आलं आहे.
l
