Viral Video: सोशल मीडियाचा वापर जितका चांगला त्याहून अधिक त्याचे गंभीर दुष्परिणामदेखील आहेत. अनेकदा आपल्यासमोर असे व्हिडीओ येतात, ज्यामध्ये काही लोक विनाकारण केवळ प्रसिद्धीसाठी आणि दिखावा करण्यासाठी सोशल मीडियावर जीवघेणे प्रयोग करत असतात. असाच एक व्हिडीओ सध्या सोशल मीडियावर व्हायरल होतोय, ज्यात काही तरुणांना इन्स्टाग्राम लाइव्हमध्ये अपघात झाल्याचे दिसत आहे.
लोकांना नेहमीच सोशल मीडियाच्या आभासी जगात वावरायला आवडतं. ज्यात काही जण इतरांना आपल्याकडे आकर्षित करण्यासाठी नवनवीन व्हिडीओ, रिल्स तयार करतात. पण, हे व्हिडीओ कधी कधी इतके जीवघेणे ठरतात ज्याची आपण कधी कल्पनादेखील करू शकत नाही. सध्या चर्चेत असलेला हा अपघातदेखील असाच भयानक आहे.
२ मे रोजी रात्री ३.३० ते ४.३० च्या सुमारास अहमदाबादहून मुंबईकडे जाणाऱ्या एका कारमध्ये २२ ते २७ वयोगटातील पाच तरुण प्रवास करत होते. यावेळी त्यांनी गाडीमध्ये मोठमोठ्यानी गाणी लावली, शिवाय ते प्रवासाचा आनंद घेत इन्स्टाग्राम लाइव्हदेखील करत होते. यावेळी लाइव्ह करणारा तरुण सांगतो, बघा मित्रांनो गाडी कशी धावतेय, गाडीतील दुसरा तरुण म्हणतो, हो १४० किमी प्रतितास वेगाने जातेय; तेवढ्यात ड्रायव्हिंग करणारा तरुण गाडीचा वेग आणखी वाढवतो आणि समोरून जाणाऱ्या एका मोठ्या गाडीच्या पुढे जाण्याचा प्रयत्न करतो. पण, तेवढ्यात त्याचे नियंत्रण सुटते आणि अचानक गाडीचा अपघात होतो. हा झालेला अपघात तरुणाच्या इन्स्टाग्राम लाइव्हमध्ये दिसत असून हा व्हिडीओ सध्या सोशल मीडियावर खूप व्हायरल होत आहे. या अपघातात पाचपैकी चार तरुणांचा जागीच मृत्यू झाला असून एक तरुण गंभीर जखमी आहे.
हा व्हायरल व्हिडीओ X (ट्विटर) वरील @Prateek Singh या अकाउंटवर शेअर करण्यात आला आहे. या व्यक्तीने या व्हिडीओसोबत कॅप्शनमध्ये माहितीदेखील शेअर केली आहे. ज्यात लिहिलंय की, “ही तरुण मुले लक्ष वेधण्यासाठी स्वतःचा आणि इतरांचा जीव धोक्यात घालतात, हे पाहणे खूप वेदनादायक आहे; ज्याला ते “भौकाल” म्हणतात. माहितीनुसार हा अपघात वासद, गुजरात येथे घडला. दुर्दैवाने पाचपैकी चार जण मरण पावले असून चालक सध्या गंभीर जखमी झाला आहे. चुकीच्या पद्धतीने वाहन चालवल्याप्रकरणी चालकावर गुन्हा दाखल करण्यात आला आहे.”
हेही वाचा: लग्नाच्या वरातीत ढोलवादकाचे अश्लील कृत्य; महिलेच्या कंबरेला पकडलं अन्… VIDEO पाहून नेटकरी संतापले
पाहा व्हिडीओ:
या व्हिडीओवर अनेक युजर्स कमेंट्स करतानादेखील दिसत आहेत, ज्यात एकाने लिहिलंय की, “आजकालची मुलं सोशल मीडियामुळे स्वतःचा जीव धोक्यात टाकत आहेत.” तर दुसऱ्याने लिहिलंय की, “या मुलांनी सिट बेल्टदेखील घातलेला नाही.” तर आणखी एकाने लिहिलंय की, “अजून म्हणा गाणी”, तर आणखी एकाने लिहिलंय, “या व्हिडीओत मी तेव्हाच घाबरलो, जेव्हा बाजूने ट्रक जात होता.”
