सध्या सगळीकडे लग्नाचा मोसम सुरू आहे. लग्न म्हणजे प्रत्येकाच्या आयुष्यातला सर्वात खास दिवस असतो. या दिवसाला आणखी खास बनवण्यासाठी नवरा नवरी काहीतरी वेगळं करण्याचा प्रयत्न करत असतात. मात्र, अनेकदा लग्नातच अशा काही मजेशीर घटना घडतात, ज्या कधीकधी जीवावर सुद्धा बेतू शकतात. सध्या सोशल मीडियावर असाच एक व्हिडीओ व्हायरल होत आहे. अंगावर शहारे आणणाऱ्या या व्हिडीओमध्ये नवरा नवरीने अत्यंत धाडसी एन्ट्री केलीय. पण हे धाडस त्यांच्या जीवावर बेतल्याची घटना घडलीय. हा व्हिडीओ एकदा पाहाच.
सोशल मीडियावर व्हायरल होत असलेल्या या व्हिडीओममध्ये आपण पाहू शकतो की, त्यात दिसतं की लग्नाच्या दिवशी नवरी आणि नवरदेव अतिशय उत्साही आहेत. डान्स आणि आतिषबाजीच्या माहौलमध्ये हे स्नटेजवर असलेले नवरा नवरी एका काचेची गोलाकार रिंग असलेल्या झुल्यामधून वर उंचावर जावून सर्व पाहूण्यांना अभिवादन करत होते. आगळ्या वेगळ्या पद्धतीने काचेच्या गोलाकार रिंगमधून वर उंचावर गेलेल्या या नवरा नवरीने सगळ्यांचे लक्ष वेधून घेतलं. सर्व पाहूणे या नवरा नवरीकडे आश्चर्याच्या भावनेने पाहू लागले. या नवरा नवरीचा गोलाकार झुला क्रेनच्या मदतीने वर उंचावर घेऊ लागले. आकाशातून सर्व पाहूण्यांना नमस्कार करून त्यांचा झुला खाली उतरवण्यात येत होता, नेमकं त्याचवेळी या गोलाकार झुल्याचा एक दोर तुटला आणि त्यातले नवरा नवरी उलटे पाटले होत तब्बल १२ फूट उंचीवरून थेट स्टेजवर धाडकन कोसळले.
नवरा नवरी त्या गोलाकार झुल्यातून तब्बल १२ फूट उंचीवरून खाली कोसळलेले पाहून तिथल्या सर्व पाहूण्यांना धक्काच बसला. आरडोओरड करत सर्व पाहूणे या नवरा नवरीला पाहण्यासाठी स्टेजवर धावू लागले. पण दैव बलवत्तर म्हणून या नवरा नवरी सुखरूप होते. परंतू या घटनेत दोघेही जखमी झाले असून काही प्रमाणात खरचटलं आहे. नवरा नवरीची ही हटके एन्ट्री आपल्या मोबाईल कॅमेऱ्यात कैद करत असताना या घटनेचा व्हिडीओ रेकॉर्ड झाला. त्यानंतर हा व्हिडीओ सोशल मीडियावर अगदी वाऱ्यासारखा पसरू लागला. हा व्हिडीओ पाहताना अनेकांच्या अंगावर शहारे येत आहेत.
इथे पाहा हा व्हायरल व्हिडीओ :
आणखी वाचा : VIRAL VIDEO : प्रेम असावं तर असं…! कोंबडीला घेऊन जाणाऱ्या माणसासोबतच भिडला कोंबडा! पुढे काय झालं ते पाहाच…
सोशल मीडियावर व्हायरल होत असलेला हा व्हिडीओ छत्तीसगडच्या रायपूरमधला आहे. रायपूरमधील तेलाबांधामध्ये शनिवारी एका भव्य लग्नसोहळ्याचं आयोजन करण्यात आलं होतं. या भव्य लग्नसोहळ्याची जबाबदारी एका इव्हेंट कंपनीला देण्यात आली होती. या कंपनीने नवरा नवरीच्या या हटके एन्ट्रीसाठी एका गोलाकार रिंगचा झुला तयार करून त्यातून एन्ट्री करण्यासाठीं नियोजन केलं होतं. या इव्हेंट कंपनीची एक चूक या नवरा नवरीच्या जीवावर बेतू शकली असती. या घटनेत इव्हेंट कंपनीने आपली चूक असल्याचं मान्य केलं असून अशी घटना पुन्हा होणार नाही, याबाबत काळजी घेतली जाईल, असा विश्वास त्यांनी दिला. त्यामुळे नवरा नवरीच्या कुटूंबियांनी याबाबत अद्याप पोलिसांत कोणतीही तक्रार नोंदवली नाही.
या घटनेनंतर सर्व पाहूणे मंडळी काही वेळ सुन्न झाले होते. सर्व पाहूणे या इव्हेंट कंपनीवर आपला रोष व्यक्त करताना दिसून आले. या घटनेचा व्हिडीओ सोशल मीडियावर मोठ्या प्रमाणात शेअर करण्यात येत असून लोकांना असं धाडस न करण्याचं आवाहन करण्यात येत आहे. लग्नात काहीतरी हटके करण्याच्या नादात आपला जीव धोक्यात येऊ शकतो, अशा भावना नेटकरी मंडळी व्यक्त करताना दिसून येत आहेत.
