Viral Video: अनेक जण घरामध्ये श्वान पाळतात. श्वानाला घरातील सदस्याएवढीच उत्तम वागणूक दिली जाते. शिवाय त्याची आवड-निवडही पूर्ण केली जाते, त्याला फिरायला घेऊन जातात. त्यामुळे श्वानाचेदेखील त्या घरातील प्रत्येकाशी खास नाते असते. अनेकदा ते घरातील लहान मुलांची काळजी घेतानादेखील दिसतात, तर बऱ्याचदा घरातील मालकाला कामात मदत करताना दिसतात. पण, आता व्हायरल होत असलेल्या व्हिडीओमध्ये एक श्वान त्याच्या रुसलेल्या मालकिणीला मनवताना दिसतोय.
आपण काही चुकीचं काम केलं की आपली आई आपल्यावर रागावते, रुसते, आपल्याशी अबोला धरते. आईचा अबोला, रुसवा कोणीही फार काळ सहन करू शकत नाही, त्यामुळे आईला मनवण्यासाठी आपण अनेक प्रयत्न करतो. असे अनेक मजेशीर किस्से आपण खऱ्या आयुष्यात किंवा चित्रपट, मालिकांमध्ये पाहिलेच असतील. पण, सध्या अशा प्रकारच्या घटनेचा एक व्हिडीओ सोशल मीडियावर खूप व्हायरल होतोय, ज्यात एक महिला चक्क तिच्या घरातील पाळीव श्वानावर रुसलेली आहे, ज्यामुळे तो श्वानही नाराज झालेला आहे.
या व्हायरल व्हिडीओमध्ये तुम्ही पाहू शकता, एका घरातील मालकीण एका ठिकाणी शांत बसली असून ती कोणत्यातरी कारणावरून श्वानावर रुसली आहे, त्यामुळे ती शेजारी बसलेल्या श्वानाकडे दुर्लक्ष करताना दिसतेय. श्वान बराचवेळ त्या महिलेकडे पाहतो, पण ती त्याच्याकडे अजिबात पाहत नाही, त्यानंतर तो महिलेच्या मांडीवर पाय ठेवून तिला हलवतो, पण तरीही ती त्याकडे पाहत नाही. तरीही श्वान तिच्याकडे पुन्हा पुन्हा पाहतो. यावेळी श्वान रडवेला होतो, व्हिडीओच्या शेवटी रुसवा घालवण्यासाठी श्वान करत असलेले प्रयत्न पाहून त्या महिलेला हसू येतं.
पाहा व्हिडीओ:
हा व्हिडीओ इन्स्टाग्रामवरील @7x_dark_या अकाउंटवर शेअर करण्यात आला असून याला अनेक व्ह्युज आणि लाईक्स मिळाल्या आहेत. तसेच यावर अनेक युजर्स कमेंट्स करताना दिसत आहेत.
एका युजरने कमेंटमध्ये लिहिलंय की, “अय्या किती गोड”, तर दुसऱ्याने लिहिलंय की, “श्वान खूप क्यूट आहे”, तर तिसऱ्या युजरने लिहिलंय की, “सदस्य आहे तो पण घरतला”, तर आणखी एकाने लिहिलंय की, “मजेशीर व्हिडीओ.”