आजपर्यंत तुम्ही सापांचे अनेक व्हायरल व्हिडीओ पाहिले असतील, कधी अतिउत्साहाने साप पकडायला जाणाऱ्यांवर सापाने केलेला हल्ला असेल किंवा कधी एखाद्या गाडीत, घरामध्ये घुसलेला भलामोठा साप असेल. असे अनेक व्हिडीओ तुम्ही पाहिले असतील. मात्र, सध्या सोशल मीडियावर व्हायरल होत असलेला व्हिडीओ पाहिलात तर तुमच्या अंगावर देखील शहारा येईल.
कारण, या व्हिडीओमध्ये डॉक्टरांनी एका महिलेच्या तोंडातून तब्बल ४ फुट लांबीचा साप काढल्याचं दिसतं आहे. सध्याच्या जमाना डिजिटल आहे. त्यामुळे अनेक वेगवेगळ्या प्रकारचे व्हिडीओ नेटकरी काही क्षणात सोशल मीडियावर पोस्ट करत असतात. ते कधी थरारक तर कधी कॉमेडी असतात.
पण आता जो व्हिडीओ तुम्ही पाहणार आहात तो तुम्हाला थक्क करणारा आहे. मिळालेल्या माहितीनुसार, ही घटना रशियातील असून एक महिला गाढ झोपेत असताना तिच्या तोंडात तब्बल चार फुटी साप शिरला, ती झोपेत असल्यामुळे तिला या गोष्टीची जाणीव झाली नाही. मात्र, काही वेळाने तिला भयंकर त्रास जाणवू लागला आणि ती बेशुद्ध झाली.
दरम्यान, या महिलेला तत्काळ रशियातील एका हॉस्पीटलमध्ये घेऊन गेले. डॉक्टरांच्या प्रचंड मेहनतीनंतर तो साप महिलेच्या तोंडातून बाहेर काढण्यात आला. पण धक्कादायक बाब म्हणजे हा साप डॉक्टरांनी बाहेर काढला तरी जीवंत होता शिवाय सापाला बाहेर काढताच त्याने डॉक्टरांवर देखील हल्ला केल्याचं व्हिडीओमध्ये दिसतं आहे.
सोशल मीडियावर हा व्हिडीओ फॅन्टॅस्टिक फॅक्टस् (Fascinating Facts) या नावाच्या अकाउंटर शेअर करण्यात आला आहे. त्याने हा व्हिडीओ शेअर करताना म्हटलं आहे की, “या महिलेच्या तोंडातून ४ फुट लांब साप काढला आहे. ती झोपेत असताना हा साप तिच्या तोंडात शिरला होता.” हा व्हिडीओ सध्या व्हायरल होत असून आत्तापर्यंत १७ लाख जणांनी तो पाहिला आहे, तर ४० हजार लोकांनी तो लाईक केला आहे.
