Viral Video of 4 year old boy locked up in the school: सोशल मीडियावर नेहमी विविध व्हिडीओ व्हायरल होताना आपल्याला दिसतात; यात लहान मुलांच्या व्हिडीओचं प्रमाण जास्त असते. त्यात शाळकरी मुलांचे, शिक्षक-विद्यार्थांचे अनेक व्हिडीओ आपण रोजच बघतो. परंतु, आता असा एक व्हिडीओ सोशल मीडियावर व्हायरल होतोय, ज्यात मुलाच्या नव्हे तर शिक्षकांच्या चुकीमुळे अवघ्या चार वर्षांच्या चिमुकल्याला शिक्षा भोगावी लागतेय.
व्हायरल व्हिडीओ (Viral Video of 4 year old boy locked up in the school)
व्हायरल झालेल्या या व्हिडीओत (Viral Video) उत्तरप्रदेश येथील प्रयागराजमधील यमुनापार भागातील एका प्राथमिक शाळेतील शिक्षकांचा निष्काळजीपणा समोर आला आहे. लोहरा प्राथमिक शाळेतील शिक्षकांनी शिवांश पाल या चार वर्षांच्या मुलाला शाळेत बंद केल्याची घटना नुकतीच घडली आहे. तब्बल चार वर्षांचं हे लेकरू शाळेत कितीतरी तास कोंडलं गेलं होतं. शाळा सुटल्यानंतर घाईघाईत शाळेचे गेट बंद करून शिक्षक घरी पळाले, पण मागे हे लेकरू राहलं आहे हे कोणाच्याच लक्षात आलं नाही.
चार वर्षांचा शिवांश त्याची बहीण शिवानीबरोबर शाळेत गेला होता. शिवांश या शाळेचा विद्यार्थी नव्हता. काही काळ लोटल्यानंतर मुलगा घरी न परतल्याने त्याच्या पालकांनी आणि कुटुंबीयांनी त्याचा शोध घेण्यास सुरुवात केली.
यानंतर शिवांश शाळेत अडकला आहे याची माहिती मिळताच सगळ्यांनी घटनास्थळी धाव घेतली. बीएसएच्या सूचनेवरून शिक्षक शाळेत पोहोचले आणि त्यांनी कुलूप उघडले. या घटनेबाबत कुटुंबीय व ग्रामस्थांमध्ये संतापाचे वातावरण आहे.
‘Mohd. Moin, ABP News’ या एक्स अकाउंटवरून हा व्हिडीओ शेअर करण्यात आला आहे. चार वर्षीय शिवांशचा शाळेत अडकल्याचा हा व्हिडीओ सध्या सोशल मीडियावर मोठ्या प्रमाणात व्हायरल होतोय. या व्हिडीओत सुरूवातील शिवांश रडतानादेखील दिसतोय. या व्हिडीओवर नेटकऱ्यांनी शिक्षकांच्या विरोधात संतापजनक प्रतिक्रिया दिल्या आहेत.
BSA प्रवीण कुमार तिवारी यांनी घेतली प्रकरणाची दखल
BSA प्रवीण कुमार तिवारी यांनी या प्रकरणाची दखल घेतली आहे. प्रवीण कुमार यांनी दिलेल्या माहितीनुसार, प्राथमिक शाळेत मुख्याध्यापकासह एकूण चार शिक्षक आहेत. मुख्याध्यापक शासकीय ड्युटीवर गेले आहेत, तर एक शिक्षिका प्रसूती रजेवर आहेत. BSA प्रवीण कुमार तिवारी यांनी प्रभारी मुख्याध्यापक जुली आणि दुसरी शिक्षिका ललिता यांना निलंबित केले आहे आणि या प्रकरणाची चौकशी सुरू केली आहे.
शाळा लवकर बंद होण्याचे गावकऱ्यांचे आरोप
शाळा बंद होण्याची वेळ २ वाजताची असून सर्व शिक्षक ११:३० वाजताच शाळा बंद करून निघून गेले होते, असा आरोप ग्रमस्थांनी केला आहे. याबद्दल चौकशी करण्याची मागणीही ग्रामस्थांनी केली आहे.
गावकऱ्यांच्या म्हणण्यानुसार, लोहरा प्राथमिक शाळेत शिकवत असलेले सर्व शिक्षक उशिरा येतात आणि शाळा लवकर बंद करून निघून जातात. याबाबत गावकऱ्यांनी अनेकदा वरिष्ठांकडे तक्रार केली आहे, तरीही यावर तोडगा निघत नसल्याचे ग्रामस्थांचे म्हणणे आहे.
© IE Online Media Services (P) Ltd