Auto-rickshaw viral video: सोशल मीडियावर अनेकदा भांडणांचे व्हिडीओ व्हायरल होत असतात. कधी सासू-सुनेचं भांडण तर कधी ट्रेनमध्ये भांडण, कधी विरुद्ध दिशेने गाडी टाकली किंवा ओव्हरटेक केली तर रस्त्यावर होणारी वाहनचालकांची भांडणं आपण अनेकदा पाहतो. या भांडणांचं रुपांतर अनेकदा मारामारीतदेखील होतं आणि परिस्थिती बिकट होते.
अशा भांडणांमध्ये काही जण आपली मर्यादादेखील ओलांडतात, समोरच्याला नको तो बोलतात आणि मनमर्जी चालवतात. सध्या असाच एक व्हिडीओ सोशल मीडियावर मोठ्या प्रमाणात व्हायरल होतोय, ज्यात भांडणाच्या नादात एका रिक्षाचालकाने चक्क कारचालकाला धमकावले, त्याच्या कारचा आरसा फोडला आणि त्याला शिव्यादेखील घातल्या.
हेही वाचा… “या दोघींना पट्ट्याने मारायला हवं”, असं का म्हणतायत नेटकरी, VIDEO पाहून कळेल नेमकं कुठे चुकलं
व्हायरल व्हिडीओ
सध्या सोशल मीडियावर रस्त्यावर झालेल्या एका भांडणाचा व्हिडीओ चर्चेत आहे. या व्हिडीओत एक रिक्षाचालक कारचालकाशी जोरजोरात भांडताना दिसतोय. व्हिडीओच्या सुरुवातीला आपण पाहू शकतो की, हा रिक्षाचालक कारचा आरसा पायाने लाथ मारून तोडताना दिसतोय. यानंतर रिक्षाचालक कारचालकाला काच खाली घेण्यास सांगतोय.
यादरम्यान रिक्षाचालक, “तू काच खाली घे आणि बोल, तुला ओव्हरटेक करताना समजलं नाही का?” असं त्या कारचालकाला जोरजोरात सांगत असतो आणि कारचा दरवाजा वाजवत असतो.
घटनेची गंभीरता लक्षात घेता कारचालक रिक्षाचालकाचा भांडतानाचा व्हिडीओ काढतो. यावर “व्हिडीओ काढून काय करतो रे”, अशी धमकीदेखील रिक्षाचालक कारचालकाला देतो आणि घाणेरड्या शिव्या देण्यास सुरुवात करतो. या भांडणात कारचालक रिक्षाचालकाला गाडी बाजूला घेऊन बोलण्याची विनंती करतो, पण रिक्षाचालक त्याचं काहीही ऐकत नाही.
हा भांडणाचा व्हिडीओ पुण्यातील असून @gharkekalesh या एक्स अकाउंटवरून शेअर करण्यात आला आहे. या व्हिडीओला “पुण्यातील ऑटो ड्रायव्हर आणि कार ड्रायव्हरमध्ये जोरदार भांडण” असं कॅप्शन देण्यात आलं आहे.
युजर्सच्या कमेंट्स
व्हिडीओ व्हायरल होताच अनेकांनी यावर आपल्या प्रतिक्रिया शेअर केल्या आहेत. एका युजरने कमेंट करत लिहिलं, “आजकाल लोक लहान-सहान भांडणालाही मोठं रूप देतात आणि उगाच व्हिडीओ बनवतात”, तर दुसऱ्याने “या ऑटोचालकाला शिक्षा झालीच पाहिजे”, अशी कमेंट केली आहे.
