दिवाळी जवळ आली की साफसफाई करण्यासाठी प्रत्येकाच्या घरी लगबग सुरू असते. एखादा सुट्टीचा दिवस मिळाला की घरातले प्रत्येक जण साफसफाई करण्याची जणू मोहीमच हातात घेतात. पण, यात स्त्रियांचा हात धरणं जरा अवघडच आहे.
आपल्या घराचा कोपरा न कोपरा साफ असावा हे घरातल्या करत्या स्त्रीला नेहमी वाटत असतं आणि खास करून दिवाळीला घर टाप-टीपच असावं असा तिचा हट्ट असतो. पण, कधीकधी अशी साफसफाई जीवघेणीदेखील ठरू शकते. सध्या अशाच एका महिलेचा व्हिडीओ सोशल मीडियावर व्हायरल होतोय, ज्यात ही महिला इमारतीच्या सगळ्यात वरच्या मजल्यावर खिडकी साफ करताना दिसतेय. धक्कादायक बाब म्हणजे ही महिला कोणत्याही संरक्षणाशिवाय इमारतीच्या खिडकीबाहेर उभी राहून साफसफाई करतेय.
व्हायरल व्हिडीओ
व्हायरल व्हिडीओत एक महिला अतिशय धोकादायक पद्धतीने खिडक्या साफ करतेय. खिडकीवर अगदी बिनधास्त उभी राहून ती साफसफाई करताना दिसतेय. अगदी आपल्या जीवाचीही पर्वा न करता आणि कोणत्याही सुरक्षिततेची खबरदारी न घेता ती खिडकीच्या काठावर उभी असल्याचे व्हिडीओमध्ये दिसतेय.
हा व्हिडीओ @peopleofculture या इन्स्टाग्राम अकाउंटवरून शेअर करण्यात आला आहे. जर दिवाळीला यांच्या घरी लक्ष्मी नाही आली तर कोणाच्याच घरी येणार नाही, असं कॅप्शन या व्हिडीओला देण्यात आलं आहे. ही घटना नेमकी कुठे घडली आहे हे अद्याप समजलेलं नाही.
हेही वाचा… “अरे काहीतरी लाज बाळग”, भररस्त्यात तरुणीचा अश्लील डान्स; VIDEO पाहून नेटकरी संतप्त
व्हिडीओ व्हायरल झाल्यानंतर या व्हिडीओने सोशल मीडिया युजर्सचं लक्ष वेधून घेतलं आहे. अनेकांनी या साफसफाईच्या जीवघेण्या कृतीवर आपल्या प्रतिक्रिया दिल्या आहेत. एका युजरने कमेंट करत लिहिलं, “लक्ष्मीजी माहीत नाही, पण जर ती महिला पडली तर यमराज नक्कीच येतील. “खतरो कें खिलाडी” अशी कमेंट दुसऱ्याने केली. तर एक जण म्हणाला, “अशी जीवघेणी सफाई कृपया करू नका.” तर “सफाई त्या करतायत भीती मला वाटतेय”, “हीच तर लक्ष्मी आहे”, “भारतीय आयांसाठी हे नॉर्मल आहे”, अशा अनेक कमेंट्स या व्हिडीओवर आल्या आहेत.
दरम्यान, याआधीही अशी साफसफाई करणाऱ्या एका महिलेचा व्हिडीओ व्हायरल झाला होता, जी तब्बल १६ व्या मजल्याच्या खिडकीबाहेर उभी राहून साफसफाई करत होती. त्यानंतर आता हा व्हिडीओ सोशल मीडियावर चर्चेत आहे.
