Tiger Viral Video: वाघ हा जंगलांचा राजा आहे असे आपल्याकडे मानले जाते. वाघ जंगलामध्ये असो वा पिंजऱ्यामध्ये त्याची दहशत आसपासच्या लोकांना अनुभवायला मिळते. वाघ अत्यंत देखणा प्राणी आहे. वाघाला जवळून पाहण्यासाठी त्याला पिंजऱ्यामध्ये ठेवावे लागते किंवा वाघांच्या अभयारण्यामध्ये पिंजऱ्याची गाडी घेऊन जावे लागते. प्राणी संग्रहालयामध्ये वाघ पाहायला मिळतात. या वाघांना लोकांशी कसे वागायचे वगैरे प्रशिक्षण दिले जाते. प्रशिक्षित वाघांच्या जवळ जाणे काहीसे सुरक्षित असते. पण तेव्हा सोबतीला सुरक्षा रक्षक असणे आवश्यक असते. प्राणी संग्रहालयात वाघाबरोबर फोटो काढत असताना अनेक गमती-जमती घडत असतात. अशाच एका विनोदी घटनेचा व्हिडीओ सध्या सोशल मीडियावर व्हायरल होत आहे.
व्हिडीओमध्ये दोन तरुण एका मोठ्या वाघाच्या जवळ बसून फोटो काढत असल्याचे पाहायला मिळते. त्या वाघाच्या गळ्यामध्ये दोरखंडदेखील दिसतो. वाघाचा नीट फोटो यावे यासाठी त्याचे तोंड कॅमेऱ्याकडे असणे आवश्यक असते. त्या पिंजऱ्याच्या बाजूला असलेली एक व्यक्ती वाघाने कॅमेऱ्याकडे पाहावे यासाठी त्याला काठी मारत असते. एक-दोन वेळा होणारा हा त्रास वाघ सहन करतो. पण वैतागून काठी मारणाऱ्या व्यक्तीकडे पाहून जोरात डरकाळी फोडतो. वाघाचा आवेश पाहून त्याच्यामागे उभे असलेले तरुण इतके घाबरतात की, ते पिंजऱ्यातून बाहेर पळू जातात. त्यातील एकजण तर लांब गेल्यावर पिंजऱ्यातील वाघाला घाबरुन नमस्कार करण्यासाठी खाली वाकतो. तर दुसरा जोराजोरात ओरडत लांब जाताना दिसतो.
हा विनोदी व्हिडीओ ट्विटरवर @HasnaZarooriHai या अकाउंटने शेअर केला आहे. फक्त २४ सेकंदांचा हा व्हिडीओ ८० हजारांपेक्षा जास्त लोकांनी पाहिला आहे. दीड हजाराहून जास्त यूजर्सनी व्हिडीओ लाईक केला आहे. अनेकांनी हा व्हिडीओ त्यांच्या मित्रांना शेअर देखील केला आहे. लोकांनी कमेंट करत या आपल्या प्रतिक्रिया दिल्या आहेत. एका यूजरने ‘वाघ अरे तुम्ही का पळताय मी तुम्हाला काही बोललो नाहीये’ अशी कमेंट केली आहे. तर दुसऱ्या यूजरने ‘त्यांनी सुसु तर केली नाही ना’ असे म्हटले आहे.
