Video Shows Bike Rider Teach Traffic Lesson To Bus Driver : भविष्यात चांगली नोकरी किंवा चांगला व्यवसाय करणे हे शिक्षणाचे खरे यश मानले जाते. पण, बदलत्या काळात फक्त पारंपरिक शिक्षण हे विद्यार्थ्यांचा सर्वांगीण विकास व त्यांचे जीवन सुखकर करण्यास उपयोगी पडत नाही, त्यामुळेच कौशल्यावर आधारित किंवा वेळेप्रसंगी आपण कसे वागले पाहिजे या शिक्षणाला अनन्यसाधारण महत्त्व प्राप्त झाले आहे. तर आज असाच एक व्हिडीओ सोशल मीडियावर व्हायरल होतो आहे, ज्यामध्ये एका बसचालकाला ट्रॅफिक नियमांचे धडे शिकवण्यासाठी एक वेगळीच युक्ती करून पहिली आहे.
व्हिडीओनुसार (Video) बसचालक चुकीच्या दिशेने येत असतो. बसचालकाची मनमानी पाहून एका दुचाकीस्वाराने त्याला अद्दल घडवण्याचे ठरवले. दुचाकीचालक त्याच्या बाईकवर एका तरुणीबरोबर बसलेला असतो. त्याच्या मागे अनेक गाड्यांची रांगसुद्धा लागलेली असते. पण, यादरम्यान एक बसचालक ओव्हरटेक करण्याच्या नादात चुकीच्या लेनमधून गाडी टाकतो. हे पाहून कोणतीही मारामारी, वाद किंवा शाब्दिक भांडण न करता दुचाकीचालक नेमके काय करतो ते व्हायरल व्हिडीओतून तुम्हीसुद्धा बघा…
व्हिडीओ नक्की बघा…
व्हायरल व्हिडीओत (Video) तुम्ही पाहिले असेल की, बसचालक चुकीच्या लेनमधून गाडी घेऊन जात असतो. हे पाहून दुचाकीचालक बसच्या अगदी समोर उभा राहतो. बाईक स्टँडवर लावतो आणि हाताची घडी घालून गप्प बाईकवर बसून असतो आणि फक्त इशारा करून रस्त्याकडे हात दाखवतो. बसचालकसुद्धा काही क्षणांत त्याची बस फिरवतो आणि बरोबर लेनमधून गाडी चालवण्यास सुरुवात करतो.
चुकीच्या लेनमधून गाडी चालवणे, दुसऱ्या वाहनाला धडकणे, बेजबाबदार असणे, पार्किंग, ओव्हरटेक करणे आदी कोणत्याही मुद्द्यांवर रस्त्यांवर भांडण सुरू होऊ शकते हे तर आपल्या सर्वांनाच माहिती आहे. कधीकधी भांडण इतकं वाढतं की ते थेट हाणामारीपर्यंत जाऊन पोहचतं. पण, तरुणाचे समजूतदारपणे वागणे पाहून सोशल मीडियावर त्याचे कौतुक होत आहे.
डिफेन्स करण्याची पॉवर
सोशल मीडियावर व्हायरल होणारा हा व्हिडीओ @telugumassmemes या इन्स्टाग्राम अकाउंटवरून शेअर करण्यात आला आहे. तसेच ‘शिक्षणाची शक्ती’; अशी कॅप्शन या व्हिडीओला देण्यात आली आहे. ‘हा व्हिडीओ पाहिल्यानंतर समाधान वाटले, शिक्षणच नाही तर आत्मविश्वासपण असला पाहिजे, डिफेन्स करण्याची पॉवर’ तर काही नेटकरी सॅल्यूट करत तरुणाची प्रशंसा करताना कमेंटमध्ये दिसून आले आहेत.
