Molestation Viral Video: गुरु शिष्याचे नाते हे सर्वात पवित्र मानले जाते मात्र या नात्याला काळिमा फासणारी एक घटना समोर येत आहे. सोशल मीडियावर व्हायरल होणाऱ्या व्हिडिओमधून एका शिक्षकाने वर्गातील लहान मुलींसह असभ्य वर्तन केल्याचा आरोप लगावण्यात येत आहे. प्राप्त माहितीनुसार हा व्हिडीओ आझमगड येथील आहे. मागील काही दिवसांपासून हा शिक्षक मुलींची छेड काढत असल्याची तक्रार विद्यार्थिनी आपल्या पालकांकडे करत होत्या. यावरून संतप्त पालकांनी शाळेवर मोर्चा काढत शिक्षकाला चांगलाच चोप दिला आहे.
व्हायरल होणाऱ्या व्हिडीओमध्ये आपण पाहू शकता की, एका शाळेच्या वर्गात शिक्षकाला काही महिला मारहाण करत आहेत. या महिलांच्या हातात चप्पल असून त्यानेच त्या शिक्षकाला बदडून काढताना दिसत आहेत. यावेळी शिक्षक वर्गातून पळून जाण्याचा प्रयत्न करतो मात्र महिला त्याला रोखून धरतात व चप्पलेने चोपतात. संबंधित शिक्षकावर वर्गातील लहान मुलींनी छेड काढल्याचा आरोप केला होता.
छेड काढणाऱ्या शिक्षकाला महिलांनी दिला चोप
प्राप्त माहितीनुसार या आरोपी शिक्षकाचे नाव बनकेलाल असल्याचे समजतेय. पालकांनी दिलेल्या माहितीनुसार पोलिसांनी बनकेलाल याला अटक केली आहे. आरोपीवर आयपीसी आणि पॉक्सो कलमांनुसार गुन्हा दाखल करण्यात आला आहे.
दरम्यान, अशा प्रकारच्या घटनांमुळे आजही ग्रामीण भागात मुलींना शाळेत पाठवण्यास टाळाटाळ केली जाते, अशा व्यक्तीला शिक्षा व्हायला हवी या पद्धतीच्या कमेंट्स व्हायरल व्हिडीओ वर दिसून येत आहेत. काही दिवसांपूर्वी ठाण्यात रिक्षा चालकाकडून शाळकरी विद्यार्थिनीचे लैंगिक शोषण झाल्याचे प्रकरण बरेच तापले होते.
