VIDEO: अबब… केवढी मोठी ही पाणीपुरी! महाकाय ‘बाहुबली पाणीपुरी’ होतेय व्हायरल

लोकप्रिय फूड ब्लॉगर लक्ष दादवानी यांनी या जगावेगळ्या बाहुबली पाणीपुरीचा एक व्हिडीओ युट्यूबवर शेअर केलाय. मध्यप्रदेशमधल्या नागपुर इथल्या प्रताप नगर परिसरात ‘चिराग का चस्का’ नावाचं एक स्ट्रीट फूट स्टॉल आहे. या स्टॉलवर मिळणारी पाणीपुरी काहीशी हटके आहे. या स्टॉलवरील वेगवेगळ्या फ्लेवरमधील पाणीपुरी मध्यंतरी चर्चेत आली होती. त्यानंतर आता पुन्हा आणखी एक हटके पाणीपुरी सध्या चर्चेचा विषय ठरतेय ती म्हणजे ‘बाहुबली पाणीपुरी’.

आता तुम्ही म्हणाल, ‘बाहुबली पाणीपुरी’ म्हणजे नेमकी कशी असते? बाहुबली सारखी दिसते का? तर होय. ही हटके पाणीपुरी बाहुबलीसारखीच मोठ्या आकाराची असून याचा व्हिडीओ सोशल मीडियावर प्रचंड व्हायरल होतोय. मोठ्या आकाराच्या पाणीपुरीमध्ये वेगवेगळ्या आंबड-गोड चटण्या आणि वेगवेगळ्या फ्लेवर्सचं पाणी भरून पाणीपुरी प्रेमींना दिली जाते.

या बाहुबली पाणीपुरीमध्ये चिंचेची चटणी, एक हंगामी संत्र्याचं पाणी (उन्हाळ्यात आंब्याचा रस), जीरेचं पाणी आणि लसूणाचं पाणी असं एकत्रित मिश्रणाची अगदी युनिव्हर्सल चव, पण या व्यतिरिक्त हाजमोलाच्या चुर्णासारख्या चवीचं, किंवा जलजिराच्या चवीचंही पाणी अनेक ठिकाणी मिळतं. तसंच बटाट्याचं सारण जे साधारणपणे इतरही पाणीपुरीच्या आत भरलं जातं. हे सारण बाहुबली पाणीपुरीच्या वरच्या एका मोठ्या दंडगोलाकार भागावर ठेवण्यात येतं. या महाकाय बाहुबली पाणीपुरीला नंतर दही, बूंदी, शेव आणि डाळिंबाच्या दाण्यांनी सजवलं जातं..आणखी काय हवं डेझर्ट लव्हर्सना.. हे डेझर्ट फक्त याच स्टॉलवर मिळतं.

ही महाकाय बाहुबली पाणीपुरी पाहून तुमच्या तोंडाला पाणी तर सुटेलच. पण ती खाणं हे एक मोठं आव्हान आहे. आपण कोणत्याही स्टॉलवर पाणीपुरी खायला गेल्यानंतर अवघ्या एक दोन प्लेटमध्ये पोट भरून जातं. पण ही महाकाय पाणीपुरी पाहून तुमच्या तोंडचं पाणी पळण्याची शक्यता आहे. या इतक्या महाकाय पाणीपुरींमध्ये नेमके खास काय आहे हे जाणून घेण्यासाठी हा युट्यूब व्हिडिओ नक्की पहा.

ही महाकाय ‘बाहुबली पाणीपुरी’ चाखताना तिचा प्रत्येक चाहता मोठा ‘आ’ वासून पुरी तोंडात घालताना नक्की विचार करेल. ज्या व्यक्तीनं हा पदार्थ शोधला ती व्यक्ती किती कल्पक असली पाहीजे नं. सोशल मीडियावरील पाणीप्रेमींमध्ये या हटके पाणीपुरीची चर्चा जोरात सुरूय. सोशल मीडियावर या महाकाय पाणीपुरीचा व्हिडीओ प्रचंड व्हायरल होत असून आतापर्यंत ३२ मिलियन लोकांनी हा व्हिडीओ पाहिलाय. त्याचप्रमाणे या व्हिडीओवर कमेंट्स करत पाणीप्रेमी आश्चर्य व्यक्त करत आहेत.