सोशल मीडियावर रोज वेगवेगवेळ्या गोष्टी व्हायरल होत असतात. कधी मजेशीर व्हिडीओ तर कधी मजेशीर फोटो. कधी लोकांना काही फोटो, व्हिडीओ पटत नाही, तेव्हा त्यावर जोरदार टिका केली जाते. सध्या अशीच एक जाहिरात व्हायरल होत आहे. मुंबईमध्ये ठिकठिकाणी या जाहिरातींचे मोठे होर्डिंग्ज लागले आहेत. त्याचा फोटो एका इंस्टापेजवर शेअर करण्यात आला आहे. ही जाहिरात घरकाम करणाऱ्या महिलांबाबत आहे. या जाहिरातीने सर्वांचे लक्ष वेधले असून आता त्यावर नेटकऱ्यांनी आक्षेप घेतला आहे.
मराठी वेशभुषेत कामवालीबाई दाखवल्यामुळे नेटकऱ्यांचा आक्षेप
त्याचे झाले असे की, सोशल मीडियावर व्हायरल होत असलेली ही जाहिरात एका वेबसाईटची आहे जी कामवालीबाई म्हणजेच झाडू-फरशी करणाऱ्या घरकाम करण्याची सेवा पुरविते. इंस्टाग्रामवर dadarmumbaikar या पेजवर या जाहिरातीचा फोटो पोस्ट केला आहे. फोटो शेअर करताना, ”मुंबईत ठिकठिकाणी मोठ्या होर्डींग्जवर ही जाहिरात झळकतेय. एकीकडे बाईपण भारी देवा, आणि दुसरीकडे ही जाहिरात… यापेक्षा मोठी विसंगती काय असू शकते?” #पुरोगामीमहाराष्ट्र #मराठीपोशाखकामवाल्यांचा?” असे कॅप्शन दिले आहे.
या जाहिरातीच्या पोस्टरवर, ”तुमच्या बायकोसाठी सर्वोत्तम गिफ्ट म्हणजे कामवाली बाई” असे लिहलेले दिसत आहे आणि खाली वेबसाईटच्या सेवांबाबत माहिती दिली आहे. त्याचबरोबर एक कामवालीबाई म्हणून नऊवारी नेसलेली आणि नथ घातलेली महिला महाराष्ट्रीयन वेशभुषेत दिसत आहे. याच फोटोवर काही लोकांनी आक्षेप घेतला आहे कारण जाहिरातीमध्ये कामवाल्याबाईला महाराष्ट्राच्या पारंपारिक वेशभूषेत दाखवले आहे. कित्येकांना ही बाब पटलेली नाही.
हेही वाचा- Business Idea: फक्त १० हजार रुपयांमध्ये सुरू करा टिकली बनवण्याचा व्यवसाय, लाखो रुपये कमावू शकता
बॉलिवूडमध्येही कामवालीबाई महाराष्ट्रीयन दर्शवत असल्याचा केला आरोप
फक्त या जाहिरातमध्ये नव्हे तर बॉलीवुडमध्येही कित्येक चित्रपटांमध्ये घरकाम करणाऱ्या महिला या महाराष्ट्रीयन वेशभुषेतच दाखवले जाते असा आरोप कित्येकजण करतात. एकाने कमेंटमध्ये लिहले आहे की, ”बॉलीवूडमध्ये कामवाली बाई ही मराठी दाखवतात, सर्वात श्रीमंत राज्य असून मराठी माणसाची मुंबईमध्ये ही काय अवस्था झाली आहे.”
नेटकऱ्यांनी व्यक्त केल्या विविध प्रतिक्रिया
तर दुसऱ्याने संबधित वेबसाईटला या फोटोबाबत तक्रार केल्याचे सांगितले,”मराठी पारंपरिक वेशभूषेस एखाद्या कामाशी निगडित करून मराठी माणसांना त्यांच्याच राज्यात त्यांना कमी लेखत आहात. ”असा आरोप त्यांच्यावर केला आहे
तर आणखी एका युजरने कमेंटमध्ये लिहिले की, ”हा आपल्या सर्वांसाठी डोळे उघडणारा क्षण आहे. मराठी कुटुंबांमध्ये मध्यमवर्गीय लोकसंख्या जास्त असल्यामुळे बऱ्याच महिला इतरांच्या घरी घरकाम करतात. कारण मराठी लोक जेवढं मिळतं त्यातचं समाधानी असतात. कोणताही धोका पत्करत नाही. व्यवसायामध्ये उतरा, पैसा कमवा म्हणजे आपल्या पुढच्या पिढ्यांना घरकाम करावे लागणार नाही”
चौथ्याने लिहिले की, ”एकदम मराठी द्वेष्टी आणि पितृसत्ताक मानसिकतेची जाहिरात आहे.”
”फक्त मराठी महिलाच कामवाली बाई दाखवायची का ?’ असेही एकाने कमेंटमध्ये म्हटले आहे.
हेही वाचा – दोन तास घ्या पण ‘या’ फोटोतील दुसरा Giraffe शोधून दाखवा! ९८ टक्के लोक ठरले अपयशी
आणखी एकाने लिहिले की, ”मराठी स्त्री म्हणजे कामवाली अडाणी बाई असचं वाटत ह्या बॉलिवूडमधील लोकांना. कोणत्याही हिंदी सिनेमामध्ये कामवाली स्त्री ही मराठी आणि अडाणी असलेली दाखवतात. ही प्रतिमा पुसून टाकणे मराठी लोकांच्या हातात आहे.”
या जाहिरातीवर अनेकांनी प्रतिक्रिया व्यक्त केल्या आहेत असून एका नव्या वादाला तोंड फुटले आहे असे दिसते.
तुम्हाला जाहिरातीबाबत काय वाटते?
