Woman Barking In Bus Video Viral : सोशल मीडियावर रोज विविध प्रकारचे व्हिडीओ व्हायरल होत असतात. त्यातील काही व्हिडीओ फार मजेशीर असतात; तर काही फारच आश्चर्यकारक किंवा विचित्र असतात. सध्या असाच एक विचित्र व्हिडीओ सोशल मीडियावर व्हायरल होत आहे. या व्हिडीओमध्ये एक तरुणी बसमधील तरुणावर ओरडताना चक्क श्वानाप्रमाणे भुंकताना दिसत आहे. हा व्हिडीओ पाहून तुम्हीही अवाक् व्हाल. कुत्रा हा माणसाच्या अतिशय जवळचा प्राणी मानला जातो. कुत्र्याचे माणसाबरोबरचे भावनिक नाते दाखविणारे अनेक व्हिडीओही तुम्ही सोशल मीडियावरही पाहिले असतील. पण, कुत्र्याप्रमाणे माणसाला भुंकताना कधी पाहिले आहे का? नाही ना; पण या व्हिडीओमध्ये तरुणी तसेच करताना दिसतेय.
व्हिडीओ पाहून असे दिसते आहे की, एक तरुणी बसमधील एका तरुणावर कुत्र्याचा आवाज काढून भुंकताना दिसत आहे. पण, तिने ही कृती फक्त व्हायरल होण्यासाठी केली नसून, त्यामागे काही वेगळे कारण आहे.
व्हायरल व्हिडीओमध्ये तुम्ही पाहू शकता की, बसमध्ये एक तरुण फोन स्पीकरवर ठेवत मोठ्या आवाजात गाणी ऐकत आहे. यावेळी एक तरुणी अचानक कुत्र्यासारखी भुंकू लागली. काही वेळ थांबल्यानंतर ती पुन्हा कुत्र्यासारखे विविध प्रकारचे आवाज काढू लागली. त्यानंतर ती तिच्या सीटवर उभी राहिली आणि पुन्हा भुंकू लागली.
बसमध्ये हेडफोनशिवाय गाणी ऐकणे तरुणाला पडले महागात
हेडफोन न लावता स्पीकरवर गाणी ऐकणाऱ्या तरुणावर ती तरुणी खूप चिडली आणि त्यामुळे कुत्र्यासारखी भुंकू लागली. यावेळी तरुणीने त्याला आधी स्पीकर मोड बंद करून सार्वजनिक ठिकाणी हेडफोनवर गाणे ऐकण्याची विनंती केली. पण, त्या तरुणाने तिचे ऐकले नाही आणि तो स्पीकरवर मोठ्याने गाणी ऐकत राहिला.
पण, अशाने तरुणी संतापली आणि त्या मुलाला धडा शिकवायचा म्हणून तिने चक्क कुत्र्यासारखे भुंकायला सुरुवात केली. त्यानंतरही तरुणाने तिचे न ऐकल्याने ती तरुणी त्याच्या अगदी जवळ जाऊन भुंकत होती; जेणेकरून अनावश्यकपणे मोठ्या आवाजात लावलेल्या गाण्यांमुळे एखाद्याला किती त्रास होतो हे त्याला कळेल.
दरम्यान, या व्हिडीओ आता युजर्सही वेगवेगळ्या कमेंट्स करीत आहेत. अनेकांनी तरुणाचे वागणे चुकीचे असल्याचे म्हटले आहे. तर काहींनी त्या तरुणीने तरुणाला चांगलाच धडा शिकवला, असे म्हटले आहे.
