McDonalds Coffee Cup Contained Dead Mouse : कॅफे, रेस्टॉरंट्समध्ये किमान चांगले आणि स्वच्छ अन्नपदार्थ मिळावेत, अशी अपेक्षा असते. मात्र, एका कॅफेमधून कॉफी ऑर्डर करणाऱ्या महिला ग्राहकाला एक धक्कादायक अनुभव आला आहे. या महिलेला कॉफी कपाच्या तळाशी चक्क मेलेला उंदीर आढळला आहे. ही घटना कॅनडातील रेजिनामधील मॅकडोनाल्ड कॉफीमध्ये घडली असून, त्याचा व्हिडीओ सोशल मीडियावर मोठ्या प्रमाणात व्हायरल होत आहे.
महिलेने दावा केला की, तिने मॅकडोनाल्ड कॅफेमधून एक कॉफी ऑर्डर केली आणि ती प्यायली. संपूर्ण कॉफी पिऊन झाल्यानंतर तिला कॉफी कपाच्या तळाशी एक मेलेला उंदीर सापडला आहे. त्याचे फोटो आणि व्हिडीओ आता सोशल मीडियावर व्हायरल होत आहेत. अनेकांनी या घटनेवर तीव्र संताप व्यक्त केला आहे. तर, अनेक जण रेस्टॉरंटवाले लोकांच्या जीवाशी खेळत असल्याचा आरोप करीत आहेत.
शेअर केलेल्या व्हिडीओमध्ये तुम्ही पाहू शकता की, एक महिला हातात कॉफी कप घेऊन आहे. यावेळी कॉफीच्या कपाच्या तळाशी एक छोटा मेलेला उंदीर दिसत आहे. हा व्हिडीओ सोशल साईट्सवर वेगाने व्हायरल होत आहे.
हा व्हिडीओ Just Bins Regina नावाच्या इन्स्टाग्राम अकाउंटवरून शेअर करण्यात आला होता. त्याशिवाय हा व्हिडीओ एक्सवरही शेअर करण्यात आला आहे. या व्हिडीओमध्ये कॉफीचा रिकामा कप दिसत आहे; ज्याच्या तळाशी थोडीशी कॉफी शिल्लक आहे आणि कपामध्ये एक मेलेला उंदीर दिसत आहे. मागून एका महिलेचा आवाज येत आहे; जी या घटनेबद्दलची माहिती देत आहे.
हा व्हिडीओवर हजारोंनी कमेंट्स केल्या आहेत. व्हिडीओवर कमेंट करताना एका युजरने लिहिलेय, “उंदीर पाहिल्यानंतर मी पूर्णपणे मरेन.” दुसऱ्याने लिहिलेय, “हे पाहून मला उलटी होईल.” त्याचबरोबर काही लोक ही संपूर्ण घटना बनावट असल्याचे म्हणत आहेत. एका युजरने लिहिले, “मॅकडोनाल्डच्या एका माजी कर्मचाऱ्याने सांगितले की, ज्या नोझलमधून कॉफी येते ते इतके लहान आहे की, त्यात उंदीर बसू शकत नाही. तिने एखादा कीटक टाकला असता, तर ते अधिक विश्वासार्ह झाले असते. हे बनावट आहे.”
