Jeevan Kadam Car Tire Burst On Mumbai- Goa Highway: मुंबई गोवा महामार्गावर गणेशोत्सवापूर्वी एका मार्गिकेचे काम पूर्ण केले जाईल तर डिसेंबर अखेरपर्यंत दोन्ही मार्गिकांचे काम पूर्ण करण्याचे नियोजन असल्याचे अलीकडेच सार्वजनिक बांधकाम मंत्री रविंद्र चव्हाण यांच्याकडून पहाणीनंतर सांगितले. पावसाळ्यात काम करता यावे यासाठी नवीन तंत्रज्ञानाचा वापर केला जाणार असल्याचेही ते म्हणाले. पण याच मुंबई-गोवा महामार्गाची भयंकर दशा दाखवणारा एका व्हिडीओ सोशल मीडियावर सध्या चर्चेत आहे. प्रसिद्ध युट्युबर जीवन कदम याने मुंबई-गोवा महामार्गावर प्रवास करताना आलेला भीषण अनुभव व्हिडिओच्या माध्यमातून शेअर करत सरकारवर ताशेरे ओढले आहेत.
जीवन कदम याने व्हिडीओमध्ये दाखवल्याप्रमाणे मुंबई- गोवा महामार्गावर पायाच्या पोटरीपर्यंत पाणी भरलेले अनेक खड्डे पडल्याचे दिसत आहे. याच खड्ड्यात अडकून जीवनच्या गाडीचा एक टायर फुटला होता. विशेष म्हणजे अशाप्रकारे खड्ड्यात गाडीचा टायर फुटला म्हणून त्याच रस्त्यावर आणखी एक गाडी थांबलेली होती. हा व्हिडीओ शेअर करताना जीवनने हा धोकादायक हायवे अजुन किती लोकांचे जीव धोक्यात टाकणार? असा प्रश्न सुद्धा उभा केला आहे.
दरम्यान, मुंबई गोवा महामार्गाच्या पळस्पे ते इंदापूर या ८४ किलोमीटर लांबीच्या पहिल्या टप्प्यातील चौपदरीकरणाचे काम १२ वर्षे रखडले आहे. यातील पळस्पे ते कासू आणि कासू ते इंदापूर अशा दोन टप्प्यांत काँक्रिटीकरणाचे काम पूर्ण केले जाणार आहे. यातील पळस्पे ते कासू टप्प्यातील १२ किलोमीटरच्या एका मार्गिकेचे काम पूर्ण झाले असून गणेशोत्सवापूर्वी उर्वरीत काम पूर्ण केले जाणार आहे. अशी माहिती जुलै महिन्यात आमदार व बांधकाम मंत्री रवींद्र चव्हाण यांनी दिली होती.
हे ही वाचा<< दादाची डोकॅलिटी! डोक्यावरचा गवताचा भारा सांभाळू की सायकल चालवू? तरुणाचा अस्सल गावाकडचा जुगाड
ऐन गणेशोत्सवात चाकरमानी गावाकडे निघण्याची आस लावून बसले असताना अशा प्रकारची रस्त्यांची अवस्था सुधारण्यासाठी सरकारने कामाचा वेग वाढवणे आवश्यक आहे.
