रेल्वेत चहा, कॉफी महागली

रेल्वेतील खाद्यपदार्थ आणि चहा, कॉफीच्या दरांमध्ये २००६ मध्ये वाढ करण्यात आली होती. त्या वेळी चहा आणि कॉफीसाठी सात रुपये दर ठेवण्यात आले होते. त्यानंतर मोठय़ा कालावधीनंतर दरवाढ करण्यात आली आहे. रेल्वेत आता दहा रुपयांमध्ये १५० मिली लिटर चहा किंवा कॉफी मिळणार आहे. दरवाढीबाबत प्रवाशांची नाराजी नाही, मात्र पेयांच्या दर्जाबाबत रेल्वेने लक्ष द्यावे, अशी मागणी सध्या करण्यात येत आहे.

रेल्वे प्रवासी ग्रुपच्या हर्षां शहा याबाबत म्हणाल्या की, चहा आणि कॉफीच्या दरात वाढ ठीक आहे. परंतु, आता रेल्वेने दर्जाकडे लक्ष दिले पाहिजे.

रेल्वेत मिळणारा चहा किंवा कॉफी अनेकदा पिण्याच्या लायकीचे नसतात. चहापानाबरोबरच खाद्यपदार्थाचा दर्जाही राखला पाहिजे. रेल्वे गाडय़ांबरोबरच स्थानकाच्या आवारात मिळणाऱ्या चहा, कॉफीच्या दर्जाबाबतही रेल्वेने लक्ष घातले पाहिजे.