वसई: डिश अँटेना सरळ करताना तोल गेला, गच्चीवरून पडून १४ वर्षीय मुलाचा मृत्यू

वसई: टीव्हीचा डिश अँटेना सरळ करण्यासाठी इमारतीच्या गच्चीवर गेलेल्या १४ वर्षीय मुलाचा तोल जाऊन खाली पडून मृत्यू झाला आहे. नालासोपारा पूर्वेच्या मोरेगावमधील शिवम नगर येथे गुरुवारी दुपारी ही दुर्घटना घडली. आदर्श मिश्रा असे या दुर्घटनेत मरण पावलेल्या मुलाचे नाव आहे.

नालासोपारा पूर्वेच्या मोरेगावमधील शिवम नगर येथे साई सृष्टी हाईट्स ही ८ मजली इमारत आहे. या इमारतीच्या ५ व्या मजल्यावर मिश्रा कुटुंबीय राहतात. मिश्रा दांपत्य उत्तरप्रदेश येथील गावी गेले होते. त्यांची आदर्श मिश्रा आणि आरती मिश्रा ही दोन्ही मुले घरी एकटीच रहात होती. गुरुवारी दुपारी दोन्ही भाऊ बहीण घरात टीव्ही बघत होते. टीव्हीचे प्रक्षेपण नीट दिसत नसल्याने आदर्श डिश अँटेना सरळ करण्यासाठी इमारतीच्या गच्चीवर गेला. तेथे डिश अँटेना सरळ करत असताना तोल जाऊन तो गच्चीतून खाली पडला. त्याला उपचारासाठी पालिकेच्या तुळींज येथील रुग्णालयात दाखल करण्यात आले. परंतु तेथे उपचारादरम्यान त्याचा मृत्यू झाला.

आणखी वाचा-नालासोपार्‍यात ४३१ कोटींचा सांडपाणी प्रकल्प

आदर्श हा याच परिसरातील सेंट अँथॉनी शाळेत ९ व्या इयत्तेत शिकत होता. शाळेत तो हुशार मुलगा म्हणून ओळखला जात होता. टीव्हीचा डिश अँटेना सरळ करण्यासाठी तो यापूर्वी अनेकदा गच्चीवर जायचा, अशी माहिती शेजरच्यांनी दिली. त्याच्या या दुर्दैवी मृत्यूबद्दल परिसरात हळहळ व्यक्त करण्यात येत आहे. या प्रकरणी गुरुवारी रात्री तुळींज पोलीस ठाण्यात अकस्मात मृत्यूची नोंद करण्यात आली आहे.