वसई: वसई पूर्वेच्या चिंचोटी येथे चप्पल तयार करण्याच्या कारखान्यात भीषण आग लागल्याची घटना घडली आहे. गुरुवारी सायंकाळी पावणेसातच्या सुमारास ही घटना घडली. ही आग विझविण्यासाठी अग्निशमन दलाचे शर्तीचे प्रयत्न सुरू आहेत. वसई पूर्वेच्या चिंचोटी नाका येथील कुरेशी कंपाउंडमध्ये चप्पल तयार करण्याचा कारखाना आहे. गुरुवारी सायंकाळी अचानकपणे या कारखान्यात आग लागल्याने खळबळ उडाली आहे. या घटनेची माहिती वसई विरार महापालिकेच्या अग्निशमन दलाला मिळताच घटनास्थळी पोहोचून आगीवर नियंत्रण मिळविण्याचे काम सुरू करण्यात आले आहे. हवेमुळे आगीचे लोळ हवेत उंच उंच पसरत असून आजूबाजूच्या गाळ्यात ही आग पसरली आहे. आगीची तीव्रता अधिक असल्याने आग आटोक्यात आणण्यासाठी शर्तीचे प्रयत्न सुरू आहेत. हेही वाचा - मेहता पिता पुत्रांच्या आत्महत्येचे गूढ कायम, कर्जबाजारी नसल्याचा सुनेचा दावा हेही वाचा - वसईत दगड खाणीत डंपर कोसळला, अपघातात चालक व १४ वर्षीय बालकाचा मृत्यू आग नेमकी कशामुळे कोणत्या कारणामुळे लागली याचे कारण समजू शकले नाही. तर दुसरीकडे आगीच्या घटनेदरम्यान त्यात कोणी व्यक्ती अडकल्या आहेत का याचाही तपास सुरू आहे.