एका अल्पवयीन मुलीला विरारच्या अर्नाळा येथील लॉज मध्ये तब्बल १७ दिवस डांबून तिच्यावर बलात्कार केल्याची धक्कादायक घटना उघडकीस आली आहे. अनैतिक मानवी वाहतूक प्रतिबंधक शाखेने या मुलीची सुटका करून तिच्यावर बलात्कार करणार्‍या तिघांना अटक केली आहे.
पीडित मुलगी १५ वर्षांची असून ती वसईत राहते. तिची ओळख लक्ष्मण शेट्टी याच्यासोबत झाली होती. शेट्टीने तिला १ नोव्हेंबर रोजी विरारच्या अर्नाळा येथील सी साईट नावाच्या लॉजींग मध्ये फूस लावून आणले आणि तिला बळजबरीने वेश्याव्यवसाय करण्यास भाग पाडले. यानंतर लक्ष्मण तेथून पसार झाला. या मुलीच्या असहायतेचा फायदा घेत लॉज चालक आकाश गुप्ता आणि कर्मचारी सुशांत पुजारी या दोघांनी देखील तिच्यावर बलात्कार केला आणि तिला कोंडून ठेवले. १७ दिवस ती या लॉजमध्ये अडकून पडली होती. शेवटी शुक्रवारी तिने अनैतिक मानवी वाहूतक प्रतिबंधक शाखेचे शाम शिंदे यांचा नंबर मिळवून झालेल्या प्रकाराची माहिती दिली. पोलिसांनी तात्काळ या लॉजवर छापा टाकून तिची सुटका केली. या प्रकरणी तिच्यावर बलात्कार करणार्‍या आरोपींविरोधात बलात्कार, पोक्सो तसेच वेश्यागमनास भाग पाडल्याप्रकरणी गुन्हा दाखल केल्याची माहिती वरिष्ठ पोलीस निरीक्षक संतोष चौधरी यांनी दिली.
