पोलिसांचे अमली पदार्थ कनेक्शन; आणखी एका पोलिसाला ७० हजारांची लाच घेताना अटत

पोलीस उपनिरीक्षक रामनाथ तांदळकर हा नया नगर पोलीस ठाण्यात कार्यरत आहे. एका आरोपीला एमडी हे अमली पदार्थ विक्री प्रकरणात अटक केली होती. त्याला जामीन मिळावा यासाठी अहवाल तयाल करण्यासाठी तांदळकर याने या आरोपीच्या भावाकडे ७० हजार रुपयांची लाच मागितली होती. याप्रकरणी आरोपीच्या भावाने ठाण्याच्या लाचलुचपत प्रतिबंधक विभागाकडे तक्रार केली होती. त्यानुसार शुक्रवारी रात्री

नया नगर पोलीस ठाण्यात सापळा वावून तांदळकर याला लाचेच्या रकमेतील ५० हजारांची रक्कम स्विकारताना रंगेहाथ अटक करण्यात आली. ठाणे लाचलुचपत प्रतिबंधक विभागाचे पोलीस अधीक्षक शिवराज पाटील यांच्या मार्गदर्शनाखाली सहाय्यक पोलीस  उपनिरीक्षक दिनकर नलावडे, योगेंद्र परदेशी, निल उगले, गणपते आदींच्या पथकाने ही कारवाई केली.

तुळींज पोलीस ठाण्यातही कारवाई

मार्च महिन्यात तुळींज पोलीस ठाण्यात कार्यरत असलेला पोलीस शिपाई विठ्ठल सगळे याला देखील अमली पदार्थ प्रकरणात लाच घेतान अटक करण्यात आली होती. अमली पदार्थ विक्रीवर कारवाई न करण्यासाठी दरमहा ५० हजारांचा हफ्ता सगळे याने मागितला होता. मात्र त्याची तक्रार केल्यानंतर ठाण्याच्या लाचलुचपत प्रतिबंधक विभागाने त्याला सापळा लावून अटक केली होती.

पोलीसच चालवत होते ड्र्ग्ज कारखाना

एप्रिल महिन्यात लातूरमध्ये एका पोलिसाच्या शेतात सुरू असलेल्या अमली पदार्थांच्या कारखान्यावर महसूल गुप्तचर संचालनालयाच्या पथकाने छापा टाकला होता. या कारवाईत ११.३६ किलो मेफेड्रोन, प्रयोगशाळेतील अत्याधुनिक उपकरणे आणि साहित्य असे १७ कोटी रुपये किंमतीचे साहित्य जप्त् करण्यात आले होते. हा कारखाना नया नगर पोलीस ठाण्यात कार्यरत  असलेला पोलीस हवालदार प्रमोद केंद्रे चालवत होता. याप्रकरणी केंद्रे याच्यासह सात जणांना पोलिसांनी अटक केली आहे.त्याच्या अन्य ७ साथीदारांनाही अटक करण्यात आली होती. प्रमोद केंद्रे हा नया नगर पोलीस ठाण्याच्या गुन्हे प्रकटीकरण शाखेत काम करत होता.