वसई: वीज गळती यामुळे होणारे नुकसान टाळण्यासाठी वीज गळती कमी करण्याच्या महावितरणनाच्या प्रयत्नंना यश आले आहे. मागील काही महिन्यात १९.२० टक्कय़ांवर असलेली वीज गळतीचे प्रमाण १८ टक्कय़ांवर आणले आहे. त्यामुळे सुमारे एक टक्कय़ांने वीज गळती कमी झाली आहे.
वसई, विरार शहरासह वाडा परिसरात महावितरणकडून ९ लाख ३८ हजार ग्राहकांना वीजपुरवठा केला जातो यात घरगुती, औद्योगिक, व्यावसायिक, कृषी असा वीज ग्राहकांचा समावेश आहे. मात्र वीज वितरण करताना व विविध प्रकारच्या निर्माण होणाऱ्या तांत्रिक अडचणीमुळे वीज गळती होत असते. तर दुसरीकडे वीजचोरीचे प्रकार यामुळे महावितरणला आर्थिक तोटा सहन करावा लागत आहे. होणारी वीज गळती कमी करण्यासाठी महावितरणने विविध उपाययोजना आखण्यास सुरुवात केली आहे. यात फिडरची क्षमता वाढविणे, रोहित्रांची संख्या वाढविणे, रबर कोटिंग बंच कंडक्टर लावणे अशा कामांची सुरुवात केली आहे. तसेच वीजचोरीचे प्रकार घडत होते त्यावर चेक मशीन, झेरा मशीन यंत्राचा वापर करून मीटर तपासणी सुरू केली आहे. त्यामुळे छुप्या मार्गाने वीजचोरी करणारे सापडू लागले आहेत. मागील काही महिन्यांपूर्वी वीज गळतीचे प्रमाण हे १९.२० टक्के इतके होते. आता हे प्रमाण १८ टक्के इतके झाले असल्याचे अधीक्षक अभियंता राजेश चव्हाण यांनी सांगितले आहे. एक टक्क्याने वीज गळतीचे प्रमाण कमी झाले असून १८ हजार लाख रुपयांनी महसुलात वाढ झाली आहे.
अधिक वीज उपलब्ध होण्यास मदत
राज्यासह वसई विरारच्या भागात वीजगळती व वीजचोरी होण्याचे प्रमाण अधिक आहे. वितरण यंत्रणेत वीजचोरी अनेक पद्धतीने होते. आकडे टाकून, मीटरचे रीडिंग बदलून, अनधिकृत वीज जोड घेऊन वीज चोरी केली जाते. विजेच्या क्षेत्रात होणारे नुकसान हे प्रामुख्याने वीजचोरीमुळेच अधिक होते. जर हे प्रमाण कमी झाल्यास वीजनिर्मितीत भर पडून अधिक वीज ग्राहकांना उपलब्ध होण्यास मदत होईल, असा विश्वास महावितरणने व्यक्त केला आहे. प्रत्येक एक टक्का चोरी व गळती थांबवल्याने वीज निर्मितीत ८०० मेगावॅटची भर पडत असते.
वीज गळतीमुळे होणारा आर्थिक तोटा कमी करण्यासाठी आम्ही प्रयत्न सुरू केले आहेत. टप्प्याटप्प्याने उपाययोजना राबवून वीज गळती कमी केली जाणार आहे.
— राजेश चव्हाण, अधीक्षक अभियंता, महावितरण, वसई
