वसई- नालासोपार्‍याती ४१ इमारतींवरील कारवाई दुसर्‍या दिवशी थंडावली आहे. गुरुवारी ७ इमारती पाडल्यानंतर मोठ्या प्रमाणात राडारोडा जमा झाल्याने कारवाईत अडथळा निर्माण झाला आहे. त्यामुळे दिवसभर हा राडारोडा हटविण्याचे काम सुरू होते.
नालासोपारा पूर्वेच्या आचोळे येथे क्षेपणभूमी आणि सांडपाणी प्रक्रिया प्रकल्पासाठी आरक्षित असलेल्या जमिनीवर भूमाफियांनी ४१ अनधिकृत इमारती बांधल्या आहेत. या इमारतीत २ हजारांहून अधिक कुटुंबे राहत आहेत. मात्र सर्वोच्च न्यायालयाने या इमारती बेकायदेशीर असल्याचे ठरवून त्यावर कारवाई करण्याचे निर्देश वसई विरार महपालिकेला दिले होते. त्यानुसार गुरुवारपासून पोलीस बंदोबस्तात कारवाईला सुरुवात करण्यात आली होती.
हेही वाचा – मध्य रेल्वेच्या वसई दिवा रेल्वे मार्गावरील वाहतूक जवळपास तीन तासांनी सुरळीत
पहिल्या दिवशी एकूण ७ इमारती पाडण्यात आल्या. या इमारती अतिधोकादायक (सी १) वर्गातील होत्या. त्यामुळे तेथील रहिवशांना बाहेर काढून कारवाई करण्यात आली होती. शुक्रवारी पुढील इमारतींवर कारवाई करण्यात येणार होती. मात्र शुक्रवारी कारवाई झाली नाही. पहिल्या दिवशी ७ इमारती पाडण्यात आल्या होत्या. त्याचा राडारोडा मोठ्या प्रमाणावर जमा झाला आहे. त्यामुळे कारवाईसाठी अडथळा निर्माण झाल्याने शुक्रवारची कारवाई स्थगित करण्यात आली आहे. राडारोडा उचलण्याचे काम सध्या सुरू आहे. तो उचलून परिसर मोकळा झाल्यानंतर पुढील इमारतींवर कारवाई केली जाईल, असे पालिकेचे उपायुक्त (अतिक्रमण) दिपक सावंत यांनी सांगितले.
कारवाई झाली नसली तरी शुक्रवारी या परिसरात पोलिसांनी बंदोबस्त ठेवला होता. सर्वत्र माती, विटांचा ढिगारा, राडारोडा होता. आपल्या घरांची मातीमोल झालेली अवस्था पाहून रहिवाशी हळहळ व्यक्त करत होते. कारवाई सुरू झाल्याने रहिवाशांनी अन्यत्र आपले बस्तान हलविण्यास सुरुवात केली आहे. सोमवारी पुढील कारवाई होण्याची शक्यता आहे.
