लोकसत्ता वार्ताहर भाईंदर : एका तरुणीचा बलात्कार करून फरार झालेल्या आरोपीला तब्बल २२ वर्षानंतर ताब्यात घेण्यास मध्यवर्ती गुन्हे शाखे पोलिसांना यश आले आहे. विनोदकुमार पांडे उर्फ मायकल असे आरोपीचे असून तो नालासोपार्‍यात रिक्षा चालवत होता. २००२ साली नालासोपार्‍यात २६ वर्षीय तरुणीचे अपहरण करून चार जणांनी तिच्यावर सामूहिक बलात्कार केला होता. याबाबत नालासोपारा पोलिस ठाण्यात गुन्हा दाखल झाल्यानंतर पोलिसांनी राजू राठोड व धीरज गिरी या दोन आरोपीना अटक केली होती. मात्र शंकर आणि मायकल असे दोन आरोपी पोलिसांच्या हाती लागले नव्हते. जुन्या प्रकरणाती फरारी आरोपींचा शोध घेण्यासाठी मध्यमवर्ती गुन्हे शाखेने तपास सुरू केला होता. आणखी वाचा-नालासोपार्‍यातील औद्योगिक कंपनीवर दरोडा, सुरक्षा रक्षकाला डांबून १४ लाखांचा ऐवज लुटला यातील विनोनदकुमार पांडे उर्फ मायकल हा आरोपी नालासोपारा येथेच रिक्षा चालवत असल्याची गुप्त माहिती पोलिसांना मिळाली होती. त्यावरून साधारण महिना भर पाळत ठेवून पोलिसांनी मायकलला ताब्यात घेतले. यात कसून चौकशी केल्यानंतर त्यांने याबाबची कबुली दिली असल्याची माहिती उपायुक्त अविनाश अंबुरे यांनी दिली आहे. मध्यवर्ती गुन्हे शाखेचे प्रभारी पोलिस निरीक्षक राहुल राख, पोलीस निरीक्षक धनंजय पोरे, सहाय्यक पोलीस निरीक्षक दत्तात्रय सरक आदींच्या पथकाने या आरोपीला पकडण्यात यश मिळवले.
