लोकसत्ता प्रतिनिधी
वसई : डिजिटल इंडियाच्या युगात सर्वसामान्य नागरीकांना विविध प्रकारच्या सोयीसुविधा या ऑनलाइन स्वरूपात उपलब्ध करून देण्यावर वसई विरार महापालिकेने भर दिला आहे. पालिकेच्या ७१ सेवांपैकी ५१ सेवा या ऑनलाइन स्वरूपात सुरू असून शहरातील नागरिकांना यापुढे विविध दाखले व परवाने घेण्यास पालिकेत जाण्याची गरज पडणार नाही.
वसई विरार महापालिकेतर्फे नागरिकांना विविध सेवा दिल्या जातात. विविध कामांसाठी पालिकेच्या विभागातून परवानग्या घ्याव्या लागतात. त्यात नळजोडणी, जन्म-मृत्यू दाखले, विवाह नोंदणी प्रमाणपत्रे, व्यवसाय परवाना, अग्निशमन परवाने, मालमत्ता विभागातील विविध दाखले आदी अनेक गोष्टींचा समावेश आहे. मात्र ते घेण्यासाठी नागरिकांना महापालिकेच्या विभागीय कार्यालयात जावे लागत होते. यासाठी नागरिकांचा वेळ जायचा. याशिवाय अर्ज केल्यानंतर तो मंजूर झाला आहे की नाही किंवा त्याची स्थिती काय आहे ते समजत नव्हते. त्यासाठी ही नागरिकांना फेऱ्या माराव्या लागत होत्या.
यामुळे वसई विरार शहर महानगरपालिकेने महाराष्ट्र लोकसेवा हक्क अधिनियम २०१५ सेवा हमी कायदा अंतर्गत नागरिकांसाठी विविध प्रकारच्या ७१ सुविधा अधिसूचित केल्या आहेत.त्यापैकी पालिकेने सद्यस्थितीत ५१ सुविधा या ऑनलाइन स्वरूपात सुरू आहेत. उर्वरित २० सेवा ऑनलाइन स्वरूपात उपलब्ध करून देण्यासाठी पालिकेचे प्रयत्न सुरू आहेत.
यासाठी पालिकेने संगणक प्रणाली विकसित करण्यात आलेली आहे. या विविध सेवांसाठी ऑनलाईन अर्ज करून विहित दिवसात घरबसल्या दाखले, प्रमाणपत्र आणि परवानग्या मिळणार आहे. याशिवाय आपल्या अर्जाची स्थिती काय आहे त्याचा देखील मागोवा (ट्रॅक) ठेवता येणार आहे. त्यामुळे विविध दाखले व प्रमाणपत्र मिळविण्यासाठीची फरफट थांबणार आहे.
यापुढे सुविधा ऑनलाइनच
कामात सुसूत्रता व गतिशीलता मिळावी यासाठी शासनाने यापुढे सर्व सुविधा ऑनलाइन उपलब्ध करून देण्याचे निर्देश महापालिकांना दिले आहेत. त्यानुसार २५ एप्रिल २०२५ पासून केवळ ऑनलाइन पद्धतीनेच सेवा उपलब्ध करून दिल्या जातील अशी माहिती महापालिकेने दिली आहे. या सर्व सेवांचा तपशील महापालिकेच्या https://vvcmc.in या संकेतस्थळावरून व आपले सेवा पोर्टलवरुन नागरिक अर्ज सादर करू शकतात. तसेच प्रभाग समिती मध्ये उपलब्ध असणाऱ्या आपले सरकार सेवा केंद्रा मार्फत अर्ज तसेच अपिल करणेबाबत सेवा उपलब्ध असे पालिकेने सांगितले आहे.
२० सेवा ऑनलाइन सेवांचे काम सुरू
७१ पैकी ५१ सेवा ऑनलाइन झाल्या असल्या तरीही अजूनही २० सेवा अजूनही ऑनलाइन करण्याचे काम सुरू आहे. यात शुश्रूषा गृह परवाना, शुश्रूषा गृह परवान्याचे नूतनीकरण, परवान्यावरील नाव बदलणे, लॉजिंग हाऊस परवाना व त्याचे नूतनीकरण, मंगल कार्यालय परवाना व त्याचे नूतनीकरण, फेरीवाले नोंदणी प्रमाणपत्र, रस्त्यावरील खड्डे , गटारावरील झाकणे, स्वच्छता याची तक्रार नोंदविणे, व्यवसाय परवाना व त्याचे नूतनीकरण, व्यवसाय परवाना हस्तांतरण, परवाना रद्द करणे, व्यवसाय परवाना धारक भागीदाराचे नाव बदलणे यासह अन्य सेवा ऑनलाइन करण्याचे काम सुरू असल्याचे महापालिकेचे उपायुक्त (माहिती तंत्रज्ञान) समीर भूमकर यांनी सांगितले आहे.