वसई- वसई विरार मधील मागील आठवड्यापासून सुरू असलेले पाणी संकट कायम आहे. कवडास येथील जलशुध्दीकरण केंद्रातील रोहित्रामध्ये मंगळवारी झालेला बिघाड अद्याप दुरूस्त झालेला नाही. परिणामी पुढील दोन दिवस शहरातील एमएमआरडीएकडूण होणारा पाणीपुरवठा बंद राहणार आहे. त्यामुळे वसईकरांना गुढीपाडवा सण देखील पाण्याविना साजरा करावा लागणार आहे. उपाययोजना म्हणून महापालिकेने काही भागात टॅंकरने पाणीपुरवाठा सुरू केला आहे
वसई-विरार शहर महानगरपालिकेला सुर्या टप्पा-१ व ३ या योजनेतुन २०० दशलक्ष लिटर्स प्रतिदिन पाणी तर मुंबई महानगर प्रदेश विकास प्राधिकरणाच्या सुर्या ४०३ दशलक्ष लिटर्स पाणीपुरवठा योजनेतून १४० दशलक्ष लिटर्स प्रतिदिन पाणी पुरवठा करण्यात येत आहे. एमएमआरडीएच्या पाणी पुरवठा योजनेतील कवडास पंपिंग स्टेशन आणि सूर्या नगर जलशुद्धीकरण केंद्र (कासा विक्रमगड) येथील जलशुध्दीकरणात आणण्यात येते. या केंद्राला महाराष्ट्र राज्य विद्युत वितरण कंपनी मार्फत विज पुरवठा होतो. मंगळवार २५ मार्च रोजी संध्याकाळी ६ वाजता सदर योजनेला वीज पुरवठा करणारा रोहित्र नादुरुस्त झाला आहे. त्यामुळे योजनेचा विजपुरवठा पुर्णपणे खंडित झाला आहे. परिणामी एमएमआरडीए मार्फत सुर्या धरणातून होणारा १४० दशलक्ष लिटर्स पाणी पुरवठा पुर्णपणे बंद झाला आहे. त्यामुळे मंगळवार पासून वसई विरार शहरात पाणी संकट निर्माण झालेेले आहे. गुरूवार पर्यंत ही दुरूस्ती अपेक्षित होती. परंतु ती होऊ शकली नाही. आता या दुरूस्तीला आणखी वेळ लागणार असल्याने वसईकरांना या पाणी संकटाचा सामना आणखी दोन दिवस सहन करावा लागणार आहे. कवडास येथील जलशुध्दीकरण प्रकल्पाती वीज पुरवठा रविवार ३० मार्च रोजी सायंकाळी ६ वाजेपर्यंत सुरळीत होणार आहे. त्यानंतर रात्री उशीरा पर्यंत सदर योजनेतून पाणी पुरवठा सुरू होणार असल्याचे एमएमआरडीएच्या अधिकाऱ्यांनी सांगितले. रविवारी गुढीपाडव्याचा सण असून त्या दिवशी देखील पाणी नसल्याने वसईकरांना पाण्यावाचून सण साजरा करावा लागणार आहे.
महापालिकेच्या सूर्या धरणाच्या नवीन आणि जुन्या योजनेतून होणारा एकूण २०० दशलक्ष लिटर्स पाणी पुरवठा सुरळीत चालू असला तरी एमएमआरडीएच्या योजनेतून होणारा पाणी पुरवठा बंद आहे. त्यामुळे वसई-विरार शहरात होणारा पाणी पुरवठा अपुऱ्या व कमी दाबाने सुरू आहे, अशी माहिती उपायुक्त समीर भूमकर यांनी दिली.
टँकरने पाणीपुरवठा
पाण्याअभावी शहरातील अनेक भागात पाणी टंचाई निर्माण झालेली आहे. उपाययोजना म्हणून ज्या झोपडपट्टी भागात जलवाहिनीव्दारे पाणी पुरवठा करणे शक्य होत नाही अशा भागात महापालिकेमार्फत टँकरव्दारे पाणी पुरवठा सुरू करण्यात आला आहे. तरी नागरीकांनी उपलब्ध पाणी जपुन वापरावे असे आवाहन महापालिकेच्या पाणीपुरवठा विभागाने केले आहे.