लाडकी बहीण कसली, तुम्ही दारातच उभे राहा म्हणत सदा सरवणकरांना महिलेने सुनावलं

Maharashtra Election 2024 Sada Sarvankar Viral Video : महाराष्ट्रात सध्या विधानसभा निवडणुकीच्या प्रचाराची धामधूम सुरू आहे. येत्या २० नोव्हेंबरला निवडणूक पार पडणार आहे, त्यामुळे प्रत्येक उमेदवार गल्लोगल्ली लोकांच्या दारात जाऊन आपला प्रचार करत फिरत आहेत. मतदारांच्या गाठीभेटी घेत आहेत. मात्र, यावेळी काही उमेदवारांना मतदारांच्या तीव्र रोषाचा सामना करावा लागत आहे. असाच काहीसा प्रकार माहीम विधानसभेचे महायुतीचे शिवसेना शिंदे गटाचे उमेदवार सदा सरवणकर यांच्याबाबतीत घडला. सदा सरवणकर माहीम कोळीवाड्यात प्रचारासाठी गेले असताना एका कोळी महिलेने त्यांच्यावर प्रश्नांचा भडीमार करत आपला संताप व्यक्त केला. महिलेने “माहीम कोळीवाड्यातील फूड स्टॉल का हटवले” असा थेट सवाल सदा सरवणकरांना विचारत चांगलेच खडेबोल सुनावले. तसेच महिलेने ‘मुख्यमंत्री माझी लाडकी बहीण’ योजनेवरून फटकारत चक्क त्यांना घरात येण्यास मनाई केली, या घटनेचा व्हिडीओ सध्या सोशल मीडियावर तुफान व्हायरल झाला आहे.