एकनाथ शिंदेच ‘ठाणेदार’, उद्धव ठाकरेंनी घेतलेल्या सभा, प्रचार व दावे का ठरले फोल?

Thane Shivsena Uddhav Thackeray Defeat: शिवसेनेतील बंडानंतर मुख्यमंत्री एकनाथ शिंदे आणि त्यांच्याबरोबर गेलेल्या ठाणे जिल्ह्यातील आमदारांचा ‘गद्दार’ असा उल्लेख करत त्यांना निवडणुकीत पराभूत करण्याची ‘गर्जना’ करणाऱ्या उद्धव ठाकरे यांच्या पक्षाला जिल्ह्यात एकही जागा जिंकता आलेली नाही. भिवंडी ग्रामीण, अंबरनाथ, कल्याण पश्चिम आणि कल्याण ग्रामीण या जागांवर उमेदवार विजयी होतील, असा ठाकरे गटाचा दावाही प्रत्यक्षात फोल ठरला आहे. महाविकास आघाडीच्या माध्यमातून उद्धव ठाकरे यांच्या पक्षाने जिल्ह्यात एकूण १० जागांवर निवडणूक लढवली होती. परंतु या सर्वच जागांवर त्यांच्या उमेदवारांचा पराभव झाला आहे. यामुळे जिल्ह्यात ठाकरे गटाचे ‘पानिपत’ झाल्याचे चित्र आहे.