काँग्रेस साशंक!

अडीच वर्षे मुख्यमंत्रीपद, १३० पेक्षा अधिक जागा आणि पक्षात प्रवेश करणाऱ्या अपक्ष आमदारांचे मतदारसंघ सोडणे या अटींमुळे राष्ट्रवादीच्या भूमिकेबद्दल काँग्रेसमध्ये संशयाचे वादळ माजले आहे. या पाश्र्वभूमीवरच, आघाडी तुटली, तर त्याची जबाबदारी आमची नाही, असा पवित्रा घेत सारे खापर राष्ट्रवादीवर फोडण्याचा प्रयत्न काँग्रेसने सुरू केला आहे. राष्ट्रवादीचा एकूण रागरंग लक्षात घेता काँग्रेस नेत्यांच्या आशा मावळल्या आहेत. पुन्हा सत्ता मिळण्याबाबत सारेच धूसर असतानाही, अडीच वर्षांसाठी मुख्यमंत्रीपद मिळावे ही अट राष्ट्रवादीने घातली. निम्म्या जागांवर अद्यापही आग्रही असल्याचे राष्ट्रवादीचे नेते सांगत असले तरी १३४ जागांचे सूत्र राष्ट्रवादीकडून मान्य केले जाईल, अशी चिन्हे आहेत. अपक्ष आणि छोटय़ा पक्षांचे दहा आमदार अलीकडेच राष्ट्रवादीत दाखल झाले आहेत. मात्र यातील आठ जणांचे मतदारसंघ गेल्या वेळी काँग्रेसकडे होते. हे मतदारसंघ आता राष्ट्रवादीमध्ये प्रवेश करणाऱ्या आमदारांसाठी सोडावेत, अशी ही राष्ट्रवादीची आणखी अट आहे.
राष्ट्रवादीची गुगली
सध्याच्या परिस्थितीत काँग्रेसप्रमाणेच राष्ट्रवादीलाही वातावरण अनुकूल नाही. अडीच वर्षे मुख्यमंत्रीपद मिळावे, अशी मागणी करीत आमचा पक्ष मोठा असल्याचा भासविण्याचा राष्ट्रवादीचा प्रयत्न असल्याचे काँग्रेस नेत्यांचे म्हणणे आहे. अडीच वर्षे मुख्यमंत्रीपद मिळावे ही राष्ट्रवादीची अट असल्याचे उद्योगमंत्री नारायण राणे यांनी सांगितले. आमचा प्रस्ताव काँग्रेसला सादर केला असून, त्यांच्याकडून प्रतिसाद अपेक्षित असल्याचे राष्ट्रवादीचे नेते प्रफुल्ल पटेल यांनी स्पष्ट केले. राणे यांनी  प्रस्ताव उघड केल्याने राष्ट्रवादी काँग्रेसमध्ये तीव्र प्रतिक्रिया उमटली होती.

१३० पेक्षा जास्त जागा नाही
राष्ट्रवादीने १३० पेक्षा जास्त जागांचा आग्रह धरला असला तरी काँग्रेस १२८ जागा सोडण्यास तयार आहे. अगदीच ताणल्यास आणखी दोन म्हणजे १३० पर्यंत जागा देण्याची काँग्रेसची तयारी आहे. पण त्यापेक्षा जास्त जागा देणे शक्य नसल्याचे स्पष्ट करण्यात आले. २००९ मध्ये राष्ट्रवादीपेक्षा दुप्पट खासदार निवडून आले तेव्हा राष्ट्रवादीने विधानसभेच्या दहा जागा सोडल्या होत्या. २०१४ मध्ये राष्ट्रवादीचे काँग्रेसपेक्षा दुप्पट जास्त खासदार निवडून आल्याने आम्हीही दहा जागा सोडण्यास तयार आहोत, अशी भूमिका प्रदेशाध्यक्ष माणिकराव ठाकरे यांनी मांडली. सरकार स्थापनेच्या वेळी पाठिंब्याचे पत्र दिलेल्या अपक्ष आमदारांचेच मतदारसंघ सोडण्याची काँग्रेसची तयारी आहे. यानुसार नवापूर आणि मालेगाव मध्य हे दोन मतदारसंघ सोडले जाणार नाहीत, असे स्पष्ट करण्यात आले.