उपनगरी गाडय़ांतून सात महिन्यांत सव्वा कोटींचे मोबाइल लंपास

मोबाइल चोरांच्या टोळ्यांनी मुंबईच्या उपनगरी गाडय़ांत उच्छाद मांडला असून प्रवाशांचे दररोज सरासरी तीन मोबाइल फोन चोरीला जात असल्याचे उघड झाले आहे. चालू वर्षांत मुंबईत एकूण ७३४ मोबाइल फोन चोरीचे गुन्हे दाखल करण्यात आले आहेत.
मोबाइल हा आता चैनीची वा दिखाव्याची वस्तू उरला नसून प्रत्येकाच्या दैनंदिन वापरात त्याला ्अत्यंत महत्त्वाचे स्थान आहे. कॅमेरा, इंटरनेट आदी अनेक सोयी मिळत असल्याने महागडे स्मार्ट फोनही वापरण्याचे प्रमाण वाढते आहे. यामुळेच पूर्वी पाकिटमारी करणाऱ्यांनी आता मोबाइल चोरीकडे लक्ष वळविले आहे. त्यामुळेच उपनगरी गाडीतील प्रवाशांकडील मोबाइल चोरीला जाण्याचे प्रमाण वाढले आहे. चालू वर्षांत (जानेवारी ते जुलै २०१४) या कालावधीत मध्य रेल्वेत ५३२ आणि पश्चिम रेल्वेत २३२ असे एकूण ७३४ मोबाइल चोरीला गेले आहेत. म्हणजे महिन्याला सरासरी शंभर आणि दिवसाला सरासरी तीन मोबाइल चोरीला जात आहेत. चोरीला गेलेले बहुतांश मोबाइल हे सॅमसंग कंपनीचे आहेत. चोरीला गेलेल्या या मोबाइल फोनची किंमत सुमारे १ कोटी ३२ लाख रुपये एवढी आहे. या सॅमसंग मोबाइलचा आयएमईआय क्रमांक बदलता येतो. त्यामुळे चोरी झाल्यानंतर ते मिळविणे पोलिसांना कठीण जात आहे.   मोबाइल चोरी रोखण्यासाठी पोलिसांनी मोबाइल चोरीविरोधी पथक स्थापन केले असून सर्व प्रमुख स्थानकांवर साध्या वेषातील हे पथक कार्यरत आहे.
मोबाईल चोरीचे तीन मार्ग..
उपनगरी गाडीतून प्रवास करताना गर्दीच्या वेळी मोबाइल चोरी होती. तसेच गर्दीच्या जिन्यावरून जात असतानाही मोबाइल चोरले गेले आहेत. एकूण तीन प्रकारांनी मोबाइलची चोरी होत असल्याची माहिती मुंबई सेंट्रल रेल्वे पोलीस ठाण्याचे पोलीस निरीक्षक राजेंद्र त्रिवेदी यांनी दिली.
ल्ल १
मोबाइल चोरांची टोळी असते तिचा म्होरक्या मुलांना या कामासाठी पाठवतो. फलाटावर ते मोबाइलवर बोलणाऱ्या लोकांना हेरून ठेवतात. एखादा प्रवासी जेव्हा गाडीत चढतो तेव्हा त्याच्या हातावर फटका मारून तो फोन खेचला जातो. गर्दीच्या वेळी त्या प्रवाशाला ते समजत नाही. त्या प्रवाशाचे लक्ष गेलेच तर गडबडीत चढताना धक्का लागल्याची सारवासारव करता येते.
ल्ल २
 मोबाइल चोरीचा दुसरा प्रकार म्हणजे हेडफोनने बोलत असताना खिशातून फोन काढणे. बऱ्याचदा प्रवासी हेडफोन लावून बोलत असतात किंवा संगीत ऐकत असतात. फोन त्यांच्या खिशात असतो आणि कानाला केवळ हेडफोन असतो. मोबाइल चोर त्याच्या जवळ जाऊन अलगद खिशातून त्याचा फोन सरकवत वर आणतो आणि पटकन लंपास करतो.
ल्ल ३
दारात उभे राहून बोलणाऱ्यांचे मोबाइल चोरणे हा मोबाइल चोरीचा तिसरा आणि सर्वात भयावह प्रकार आहे. एखादा प्रवासी जेव्हा दारात उभा राहून बोलत असतो तेव्हा बाहेर उभे राहून काठीने त्या प्रवाशाच्या हातावर फटका मारला जातो. त्यामुळे त्याच्या हातातून मोबाइल निसटून तो खाली पडतो. मग बाहेर उभी असलेले चोरटे तो मोबाइल पळवतात. रुळावर उतरून चोरांचा पाठलाग करणे शक्य नसते. मोबाइल चोरीच्या प्रयत्नात चोर काठीने जो फटका मारतात यामुळे प्रवाशाला शारीरिक दुखापत होण्याचीही शक्यता असते.
नशेच्या गोळ्या घेऊन चोरी
चोरी करणारी मुले २० ते २२ वर्षे या वयोगटातील असतात. त्यांचा म्होरक्या वेगळा असतो. फलाटावर आधी ते पाहणी करतात. ट्रेनमध्ये चढताना प्रवाशाने फोन कुठल्या खिशात ठेवला आहे, ते पाहून ठेवले जाते. तो एकटा आहे का हेही तपासले जाते. ही मुले चोरी करण्यापूर्वी नशेच्या गोळ्या घेतात. आतापर्यंत जेवढय़ा मुलानां मोबाइल चोरी प्रकरणात अटक झाली, त्यांनी अशा गोळ्या घेतल्या होत्या. त्यामुळे धाडस करता येते आणि पकडले गेल्यास मार खाण्याचे बळ अंगी येते, असे त्रिवेदी यांनी सांगितले
या गोष्टी काटेकोरपणे पाळा..
* उपनगरी गाडीमध्ये चढताना शक्यतो मोबाइलवर बोलत चढू नये. कारण बोलणे आणि गाडी पकडणे या दोन क्रियांमुळे लक्ष विचलित होते आणि चोर याचा नेमका फायदा घेतात.
* गाणी ऐकताना आपण दंग होतो. त्यामुळे हेडफोन लावून बोलताना किंवा गाणी ऐकताना फोन हातात असावा.
* दारात उभे राहून कधीच बोलू नये. हाताला काठीने फटका मारून मोबाइल चोरला जातो. मोबाइल चोरीचा प्रयत्न तुमच्या जिवावरही बेतू शकतो.
* सगळ्यात महत्वाचे म्हणजे मोबाइलमध्ये कधीच आपली खाजगी माहिती, छायाचित्रे ठेऊ नयेत, त्याचा गैरवापर केला जाऊ शकतो, हे वेळोवेळी सिद्ध झालेले आहे.