कवडधन रस्ता कामासाठी पावणेदोन कोटी उपलब्ध

सेलू तालुक्यातील प्ररामा ६ ते कवडधन रस्त्यासाठी संशोधन व विकास कार्यक्रमांतर्गत प्रधानमंत्री ग्रामसडक योजनेतून १ कोटी ७४ लाखांचा निधी उपलब्ध झाल्याची माहिती खासदार गणेशराव दुधगावकर यांनी दिली.
प्ररामा ६ ते कवडधन रस्त्याची एकूण लांबी ४.१२० कि.मी. असून, यात ५ लहान पुलांचा समावेश आहे. हा रस्ता काळय़ा मातीतून जात असल्याने याची बांधणी अत्याधुनिक संशोधन व विकास कार्यक्रमांतर्गत आरबीआय ८१ या रसायनाचा वापर करून करण्यात येणार आहे. त्यामुळे रस्त्याची गुणवत्ता व टिकाऊपणा वाढणार आहे. या कामाच्या निधीसाठी खासदार दुधगावकर यांनी पाठपुरावा केला होता. त्यांच्या प्रयत्नाला यश आले असून प्रधानमंत्री ग्रामसडक योजनेतून या रस्त्यासाठी १ कोटी ७४ लाख रुपये मंजूर झाले.
कामाची निविदाही जाहीर करण्यात आली. खासदार दुधगावकर यांनी आणखी चार रस्त्यांची मागणी केली आहे. त्यात विटा-लासीन-खडी उक्कडगाव (तालुका सोनपेठ) १२ कि.मी. जोडरस्ता जवळा जुट्टे (तालुका पाथरी) ३ कि.मी., जोडरस्ता सातला (तालुका परभणी) ३.५ कि.मी., रामपुरी थार वांगी (तालुका मानवत) १३.५० कि.मी. या कामांचे प्रस्ताव प्रधानमंत्री ग्रामसडक योजनेकडे पाठविले आहेत.