राज्य नाटय़ स्पर्धेच्या अंतिम फेरीत व्यावसायिक रंगभूमीवरील १० नाटके

महाराष्ट्र राज्य मराठी व्यावसायिक नाटय़ स्पर्धेच्या प्राथमिक फेरीचा निकाल जाहीर करण्यात आला आहे. अंतिम फेरीसाठी व्यावसायिक रंगभूमीवरील दहा नाटकांची निवड करण्यात आली आहे. यामध्ये ‘फॅमिली ड्रामा’ (एकदंत क्रिएशन्स), ‘सुखान्त’ (आशय प्रॉडक्शन्स), ‘दुर्गाबाई जरा जपून’ (कौशिक), ‘प्रपोजल’ (रंगमंच, मुंबई), ‘बेचकी’ (भद्रकाली प्रॉडक्शन्स), ‘लहानपण देगा देवा’ (अष्टरंग एण्टरटेन्मेंट), ‘टॉम आणि जेरी’ (अश्विनी-अद्वैत थिएटर), ‘एका क्षणात’ (माऊली प्रॉडक्शन्स), ‘मायलेकी’ (श्री चिंतामणी), ‘सगळे उभे आहेत’ (अथर्व थिएटर) अशा दहा नाटकांचा समावेश         आहे.
स्पर्धेची अंतिम फेरी ३ एप्रिलपासून साहित्य संघ मंदिर, गिरगाव येथे घेण्यात येणार असल्याचे सांस्कृतिक कार्य संचालनालयाने पत्रकात म्हटले आहे. स्पर्धेचे परीक्षक म्हणून श्रीराम खाडिलकर, प्रकाश निमकर, अविनाश खर्शीकर यांनी काम पाहिले.