नवी मुंबई, उरण व पनवेलमध्ये ३५ किलोमीटरच्या अंतरात तब्बल १३ टोल

महागाईच्या वणव्यात याअगोदरच नागरिक होरपळून निघाले आहेत. कोकण आणि पुण्याला जाताना सायन-पनवेल मार्गाचा अवलंब हजारो वाहनांना करावा लागतो. यामुळे खारघर येथे नवीन होणारा टोलनाका हा वाहनचालकांची वाटमारी ठरणार आहे. शिवसेना ही वाटमार कदापि खपवून घेणार नाही. वाशी ते खारघर हे अंतर लक्षात घेता हा टोल कायदेशीरदृष्टय़ा अन्यायकारक आहे. त्यामुळे लवकरच संबंधित विभागाला तसे लेखी पत्राद्वारे कळवून आम्ही या टोलला प्रथमदर्शनी विरोध करू. त्यानंतरही टोल उभारण्याच्या हालचाली दिसल्यास हा टोल उभारू देणार नाही.  
शिवसेना रायगड जिल्हाप्रमुख
-बबन पाटील

सरकारची अनेक धोरणे चुकली आहेत. अशाच उदाहरणांपैकी एक टोल हे आहे. पनवेलच्या वाहनचालकांना स्थानिक वाहनचालकांचा दर्जा देऊन त्या वाहनांकडून टोल आकारला जाऊ नये अशी शेकापची भूमिका आहे. शेकापक्षाचा विकासाला विरोध नाही. जेवढा खर्च रस्ता उभारणीसाठी येतो तो जरूर आकारावा. मात्र पनवेल येथील खारपाडा गावाजवळील आणि वडखळ येथील टोल बांधकामाची रक्कम वसूल होऊनही सूरूच आहेत. अशा अनियमिततेला शेकाप विरोध दर्शविणार आहे. खारघर येथील टोलमधून स्थानिक वाहनांना सूट न दिल्यास आम्हाला लोकहितासाठी आंदोलनाचे हत्यार उपसावे लागेल.
शेतकरी कामगार पक्षाचे जिल्हा सरचिटणीस -बाळाराम पाटील

भारतीय जनता पार्टीने याअगोदरच राज्यात भाजपा महायुतीचे सरकार आल्यास टोलमुक्त रस्ते करू असे जाहीर केले आहे. त्यामुळे नवीन टोल आकारणीला भाजपाचा संपूर्णपणे विरोध राहील. मे महिन्यापासून खारघर स्पॅगेटी येथील मार्गावर टोल आकारणीसाठी सरकारने हालचाली केल्यास भाजपाचे कार्यकर्ते रस्त्यावर उतरून या टोलविरोधी भूमिका मांडतील. त्यानंतरच्या सामान्यांसाठी पुकारलेल्या आंदोलनाला सरकार जबाबदार असेल.
भाजपा रायगड जिल्हाध्यक्ष
-बाळासाहेब पाटील

चांगल्या रस्त्यांमुळे कालचा सायन-पनवेल मार्ग आज राज्य महामार्ग झाला आहे. येथील वाहतूककोंडी पूर्वीच्या तुलनेत आज अल्प प्रमाणात आहे. भविष्यात या मार्गावरील रस्ते काँक्रीटचे असावेत ही काळाची गरज आहे. मात्र टोल आकारणी नियमित असावी. संबंधित कंपनीने किती वर्षांमध्ये टोल संपेल याची तारीख टोलनाक्यावर जाहीर करावी. या टोल आणि विकासाला आरपीआयचा विरोध नाही. मात्र टोलनाक्याच्या परिसरातील १० ते १२ किलोमीटर अंतरावरील स्थानिक वाहनचालकांना ही टोलसक्ती नसावी. ही टोलसक्ती स्थानिकांच्या मुळावर उठल्यास आरपीआय या टोलला विरोध करेल.  
आरपीआयचे रायगड जिल्हाध्यक्ष
-जगदीश गायकवाड