महावितरणच्या ३१० कोटींच्या आराखडय़ास मंजुरी

औरंगाबाद महावितरण परिमंडलाच्या विविध विकासकामांसाठी ३१० कोटी ७८ लाख रुपयांच्या आराखडय़ास मंजुरी मिळाली. नवीन २४ उपकेंद्रे, २७७० रोहित्रे तसेच १ हजार ६५१ किलोमीटर उच्चदाब वाहिनी व २ हजार ५२ किलोमीटर लघुदाब वाहिनीचे काम यातून होणार आहे. औरंगाबाद ग्रामीण, जालना जिल्ह्य़ातील घरगुती व्यापारी, औद्योगिक व पाणीपुरवठय़ाच्या ४४ हजार वीजग्राहकांना नवीन वीजजोडण्या यामुळे देता येणार आहेत.
महावितरणच्या ६ हजार ५०० कोटी रुपयांच्या खर्चास मंत्रिमंडळाने मंजुरी दिली होती. औरंगाबाद ग्रामीण व जालना जिल्ह्य़ात ३१० कोटी ८८ लाख रुपयांची कामे केली जाणार आहेत. औरंगाबाद विभागात ३३ केव्हीची १० नवीन उपकेंद्रे, कन्नडमध्ये ५ उपकेंद्रे, जालन्यामध्ये ५ उपकेंद्रे उभारली जाणार आहेत. परिमंडलात ४ किलोमीटर भूमिगत वाहिन्या टाकण्यात येणार आहेत.