नोकरी लावून देण्याचे आमिष दाखवून फसवणूक

शाळांमध्ये नोकरी लावून देण्याचे आमिष दाखवून चार लाखाने बेरोजगारांची फसवणूक केल्याप्रकरणी एका तरुणीसह दोघांना अजनी पोलिसांनी अटक केली. प्रणय दत्तराज नारनवरे (रा. रिपब्लिकन नगर, जरीपटका) व स्मिता रमेश गद्रे (रा. उल्हास नगर) ही अटक केलेल्या आरोपींची नावे आहेत. या दोन्ही आरोपींनी त्यांच्या संपर्कात आलेल्यांना दिल्ली पब्लिक स्कूल व तुली पब्लिक स्कूल या शाळांमध्ये ओळख असल्याचे सांगत नोकरी लावून देण्याचे आमिष दाखवले. त्याच्या या आमिषाला बरेच बेरोजगार बळी पडले.
दिल्ली पब्लिक स्कूल व तुली पब्लिक स्कूल या शाळांमध्ये समन्वयक व सहायक कारकून या दोन पदांवर नोकरी लावून देण्यासाठी गजानन श्रावण मरघडे (रा. विश्वकर्मा नगर) व इतरांना स्मिताच्या घरी बोलावण्यात आले. नोकरीवर रुजू होण्याचे पत्र देऊन एकूण चार लाख पंधरा हजार रुपये आरोपींनी घेतले. हे पत्र घेऊन मरघडे व इतर बेरोजगार शाळांमध्ये गेले तेव्हा हे पत्र खोटे असल्याचे उघड झाले. डिसेंबर २०१२ नंतर हा प्रकार घडला. गजानन मरघडे व इतर बेरोजगारांनी तक्रार केली. पोलिसांनी प्रणय दत्तराज नारनवरे (रा. रिपब्लिकन नगर, जरीपटका) व स्मिता रमेश गदरे (रा. उल्हास नगर) या दोघांना अटक केली.