गुन्हे-वृत्त : गावठी कट्टे, जिवंत काडतुसे जप्त

मीरारोड येथील शांतीपार्क परिसरात मंगळवारी रात्री गस्तीवर असलेल्या पोलिसांना एका तरुणाच्या मोटारसायकलमध्ये दोन गावठी कट्टे आणि सहा जिवंत काडतुसे सापडली. ही शस्त्रे एका केबल व्यावसायिकाची असल्याची माहिती पोलिसांच्या तपासात पुढे आली आहे. या प्रकरणी ठाणे ग्रामीण पोलिसांच्या स्थानिक गुन्हे अन्वेषण शाखेने दोघांना अटक केली असून त्यांच्याकडून शस्त्रे जप्त केली आहेत.
राहुल सिंग व विकास मांजरेकर अशी अटक करण्यात आलेल्या दोघांची नावे आहेत. यातील विकास हा केबल व्यावसायिक आहे. मंगळवारी रात्री शांतीपार्क परिसरात स्थानिक गुन्हे अन्वेषण शाखेच्या पथकाला राहुलची हालचाल संशयास्पद आढळली. त्याची चौकशी केली असता मोटारसायकलीमध्ये दोन गावठी कट्टे आणि सहा जिवंत काडतुसे सापडली.
विकासाकडे केबल टेक्निशिअन म्हणून काम करीत असून ही शस्त्रे त्याची असल्याची माहिती राहुलने पोलिसांना दिली. याप्रकरणी मीरारोड पोलीस ठाण्यात गुन्हा दाखल करण्यात आला असून पोलिसांनी राहुल आणि विकास या दोघांना अटक केली आहे.
कुटुंबाला मारहाण
ठाणे : कळवा येथील शांतीनगर परिसरात राहणाऱ्या एका मुलीने विनयभंग करणाऱ्या दुकानदाराची माहिती वडिलांना दिली. त्यामुळे संतापलेल्या दुकानदाराने आपल्या मित्रासोबत या मुलीच्या कुटुंबीयांना बेदम मारहाण केली. त्यात तिचे आई-वडील व बहीण जखमी झाली आहे.  मंगळवारी सकाळी ही घटना घडली असून याप्रकरणी दुकानदार नोबो आणि त्याच्या मित्राविरोधात कळवा पोलीस ठाण्यात गुन्हा दाखल झाला आहे
पतीविरोधात गुन्हा
ठाणे : बाळकूम येथील रुणवाल गार्डनमध्ये राहणाऱ्या स्नेहा मिरचंदाणी या महिलेचा मृतदेह गळफास घेतलेल्या अवस्थेत आढळला होता. पती राजेश मिरचंदाणी याच्या त्रासाला कंटाळून स्नेहाने
आत्महत्या केल्याची तक्रार तिचा भाऊ भरत शर्मा यांनी केली असून याप्रकरणी कापुरबावडी पोलीस ठाण्यात राजेशविरोधात गुन्हा दाखल करण्यात आला आहे.
चोर पकडला
ठाणे : नौपाडा येथील चरई भागातील लक्ष्मीसदनमध्ये रोडीलाल पटेल (४०) राहत असून ते बुधवारी दुपारी काही कामानिमित्त घराबाहेर गेले होते. याच संधीचा फायदा घेऊन त्यांच्या घरात चोरी करण्यासाठी सलीम अन्सारी (३१) हा कडीकोयंडा तोडत होता. चोरीच्या प्रयत्नात असतानाच शेजाऱ्यांनी त्याला रंगेहाथ पकडले असून नौपाडा पोलिसांच्या ताब्यात दिले.
भिवंडीत बलात्कार
भिवंडी : शांतीनगर येथील गैबीपीररोड भागात गरीब नवाज नावाचे बुरख्याचे दुकान असून या दुकानात एका १७ वर्षीय मुलीवर बलात्कार करण्यात आल्याची घटना समोर आली आहे. या घटनेमुळे शहरात एकच खळबळ उडाली आहे. एप्रिल आणि मे २०१४ या कालवधीत ही घटना घडली असून याप्रकरणी इफ्तेकार अन्सारी (५५) याच्याविरोधात शांतीनगर पोलीस ठाण्यात गुन्हा दाखल झाला आहे.