सागरी नियमन क्षेत्राच्या (सीआरझेड) नियमांकडे डोळेझाक करीत नवी मुंबईतील पाम बीच मार्गासह अन्यत्र खाडीकिनारी उभारल्या गेलेल्या आलिशान गगनचुंबी इमारतींमध्ये सुमारे दीड ते दोन कोटी रुपयांची घरे विकत घेऊन मुंबईतील क्वीन्स नेकलेसचा ‘फील’ घेऊ पाहणाऱ्या रहिवाशांना सध्या दोन वेळच्या पाण्यासाठी टँकरची वाट पाहावी लागत आहे. सीआरझेडच्या कात्रीत सापडलेल्या या इमारतींना कायमस्वरूपी पाण्याची जोडणी देण्यास महापालिकेने नकार दिला आहे. भोगवटा प्रमाणपत्र नसल्यामुळे यापैकी काही इमारतींना व्यावसायिक दराने पाणी जोडणी देण्याचा पर्याय महापालिकेपुढे आहे. मात्र, न्यायालयीन प्रक्रियेच्या कचाटय़ात सापडून नसती आफत ओढवून घ्यायला नको म्हणून पाणीपुरवठा विभागाचे अधिकारी ताकही फुंकून पिऊ लागले आहे. त्यामुळे कोटय़वधी रुपयांच्या घरांचे मालक असलेल्या रहिवाशांना दररोज टँकरने मिळणाऱ्या पाण्यावर गुजराण करावी लागत आहे.
मुंबईतील मरीन ड्राइव्हच्या धर्तीवर उभारण्यात आलेला नवी मुंबईतील पाम बीच मार्ग या शहराचा क्वीन्स नेकलेस म्हणून प्रसिद्ध आहे. एक्स्प्रेस हायवेच्या धर्तीवर बेलापूर ते वाशी या उपनगरांच्या पट्टय़ात उभारण्यात आलेल्या ११ किलोमीटर अंतराच्या या मार्गावर वाहनाची सैर एक अनोखा अनुभव असतो. पूर्वेकडे विस्तीर्ण असा खाडीकिनारा आणि पश्चिमेकडील बाजूस आलिशान, गगनचुंबी इमारतींच्या रांगा. यामुळे पाम बीच मार्गाची ऐट काही औरच असते. या मार्गाला लागून असलेल्या गगनचुंबी इमारतींमध्ये वास्तव्य असणे, हे एक प्रकारे ‘स्टेटस सिम्बॉल’ मानले जाते. यामुळेच मुंबईतील बडे डॉक्टर, चित्रपट अभिनेते, बिल्डर, राज्यातील वरिष्ठ सनदी अधिकारी, आयपीएस दर्जाच्या बडय़ा अधिकाऱ्यांनी या मार्गावर वनश्री, शगुफा, ययाती, अमर, व्हीनस अशा मोठय़ा गृहप्रकल्पांमधून आपली घरे थाटली आहेत. नवी मुंबईतील एका मोठय़ा विकासकाने या मार्गावर उभारलेल्या एका मोठय़ा गृहसंकुलात २९ व्या मजल्यावर थाटलेले सुमारे ६००० चौरस फुटाचे आलिशान घर हे पाम बीच मार्गाच्या ‘श्रीमंती’चे प्रतीक मानले जाते. या मार्गावर श्रीमंतीचा हा जो थाट आहे, तशाच प्रकारे गैरव्यवहार आणि घोटाळ्यांची माळही या ‘क्वीन्स नेकलेस’ची उभारणी करताना गुंफली गेली आहे. मोठय़ा गृहसंकुलांमध्ये सर्रासपणे झालेली एफएसआय चोरी, भूखंड वाटप करताना झालेले गैरव्यवहार, बोगस गृहनिर्माण संस्था उभारून लाटले गेलेले भूखंड आणि या घोटाळ्यांना लाभलेला महापालिका-सिडकोचा आशीर्वादाच्या सुरस कहाण्या या मार्गाला तशा नव्या नाहीत. सागरी नियमन क्षेत्राच्या (सीआरझेड) नियमांकडे डोळेझाक करीत या मार्गावर सर्रासपणे वाटले गेलेले भूखंडाचे प्रकरण पुन्हा एकदा वादात सापडले असतानाच या भूखंडांवर उभ्या राहिलेल्या आलिशान इमारतींवर ‘अनधिकृत’ असा शिक्का बसल्याने कोटय़वधी खर्च करून घर खरेदी करणारे रहिवासी पुरते हादरून गेले आहेत.
टँकरने पाणीपुरवठा
पाम बीच मार्गावर नेरुळच्या दिशेने उभारण्यात आलेल्या वाधवा बिल्डरचा पाम बीच रेसिडन्सी हा आशिया खंडातील सर्वाधिक लांबीचा गृहप्रकल्पही सीआरझेडचे उल्लंघन केल्याप्रकरणी वादात सापडला आहे. सिडकोने या ठिकाणी भूखंड वाटप केले तेव्हाच शहरातील काही जाणकारांनी खारफुटींलगत उभ्या राहत असलेल्या या प्रकल्पाला विरोध सुरू केला होता. मात्र, या विरोधाला वाकुल्या दाखवत गेल्या काही वर्षांत या लांबलचक गृहसंकुलाचे इमले मोठय़ा दिमाखात उभे राहिले. या ठिकाणी प्रकल्पात सुमारे ५०० हून अधिक घरांची बांधणी करण्यात आली आहे. पाम बीच मार्गावरील बाजारभाव लक्षात घेता ८०० ते १००० चौरस फुटांची एक सदनिका दीड ते दोन कोटी रुपयांना विकली जाते. या संकुलात १५००, २०००, २५०० चौरस फुटांची घरेदेखील आहेत. काही घरांच्या किमती तीन-साडेतीन कोटी रुपयांच्या घरात आहे. सीआरझेडमध्ये सापडल्यामुळे या घरांना भोगवटा प्रमाणपत्र देण्यास महापालिकेने नकार दिला आहे. वीज मंडळातील अधिकाऱ्यांना हाताशी धरून या प्रकल्पासाठी वीज जोडणी मिळविण्यात बिल्डरला यश आले असले तरी महापालिकेने पाणीपुरवठा सुरू करण्यास नकार दिला आहे. इमारत बेकायदा असल्यामुळे व्यावसायिक दराने पाणीपुरवठा सुरू करा, असा आग्रह धरण्यात आला आहे. मात्र, नसते बालंट नको म्हणून महापालिकेने हात झटकले आहेत. त्यामुळे कोटय़धीश घरमालकांना टँकरच्या पाण्याने तहान भागवावी लागत आहे. सीआरझेडमध्ये सापडलेल्या काही इमारतींना महापालिकेने यापूर्वीच भोगवटा प्रमाणपत्र देऊ केले आहे. तरीही केंद्र सरकारच्या पर्यावरण विभागाची परवानगी मिळत नाही तोवर तेथील रहिवाशांवर टांगती तलवार कायम आहे. केंद्राच्या पर्यावरण विभागाकडून या इमारतींना ना हरकत दाखला मिळविण्यासाठी पुन्हा एकदा जोरदार फिल्डिंग लावण्यात आली आहे.
