ज्यांच्याकडे विकासाची दृष्टी आहे, असे नेतृत्व कुठल्याही राजकीय पक्षात किंवा जाती-धर्मामध्ये असले तरी त्याकडे नकारात्मक दृष्टीने न बघता खंबीरपणे त्यांच्या पाठीशी उभे राहून मदत केली पाहिजे. तरच समाजात चांगली काम करणारी माणसे तयार होतील आणि समाजाचा विकास होईल, असे प्रतिपादन भारतीय जनता पक्षाचे माजी राष्ट्रीय अध्यक्ष नितीन गडकरी यांनी केले.
निर्मल उज्वल क्रेडिट को ऑप. सोसायटी लि.तर्फे दक्षिण नागपुरातील उमरेड मार्गावर उभारण्यात आलेल्या निर्मल नगरीचा हस्तांतरण सोहळा नितीन गडकरी यांच्या उपस्थितीत पार पडला. यावेळी निर्मलनगरीतील काही सदनिकाधारकांना चाव्या सुपूर्द करून निवासी गाळ्यांचा ताबा देण्यात आला. राष्ट्रवादी काँग्रेसचे नेते आमदार विनायक मेटे यांच्या अध्यक्षतेखाली झालेल्या या कार्यक्रमाला महापौर अनिल सोले, आमदार दीनानाथ पडोळे, स्थायी समितीचे अध्यक्ष दयाशंकर तिवारी, गायक स्वप्नील बांदोडकर, नगरसेवक किशोर कुमेरिया, नीता ठाकरे, बँकेचे सचिव प्रमोद मानमोडे आदी मान्यवर उपस्थित होते. समाजात चांगले काम करणारी माणसे अनेक असताना तो कुठल्या राजकीय पक्षाचा आहे की धर्माचा याचा विचार न करता त्याच्या पाठीशी उभे राहण्याची गरज आहे. समाजात चांगली कामे करताना अनेक संकटे येत असली तरी त्यातूनही तो काम करीत असतो. मात्र काही प्रसारमाध्यमे आणि नकारात्मक दृष्टी असलेला वर्ग त्यांच्याकडे सतत आरोपी म्हणून त्यांच्याकडे पहात असतो. चांगल्या माणसाला समाजातून उद्ध्वस्त करायला काही वेळ लागत नाही मात्र आयुष्यभर प्रामाणिकपणे काम करणाऱ्यांना किती कष्ट सोसावे लागतात याचा विचार मात्र केला जात नाही, अशी खंत गडकरी यांनी व्यक्त केली. यावेळी उपस्थितांची भाषणे झाली. प्रमोद मानमोडे यांनी प्रास्ताविक तर संचालन माधवी पांडे यांनी केले.
निर्मल-उज्वल क्रेडिट को-ऑपरेटिव्ह सोसायटी लिमिटेडच्या उमरेड मार्गावरील निर्मल नगरीच्या स्वप्नपूर्ती सोहळ्यात दीपप्रज्वलन करताना भाजपचे माजी राष्ट्रीय अध्यक्ष नितीन गडकरी. शेजारी महापौर अनिल सोले, आमदार विनायक मेटे, निर्मल उज्वलचे सर्वेसर्वा प्रमोद मानमोडे, गायक स्वप्नील बांदोडकर, माजी उपमहापौर किशोर कुमेरिया आदी. (लोकसत्ता छायाचित्र)
भारतीय जनता पक्षाचे माजी राष्ट्रीय अध्यक्ष नितीन गडकरी यांना दिल्लीच्या राजकारणात लहान करण्याचा प्रयत्न करण्यात आला असला तरी आपल्यासाठी ते महाराष्ट्राचेच नव्हे तर देशाचे मोठे नेते आहेत. त्यामुळे आपल्या माणसाला आपणच मोठे केले पाहिजे, अशा शब्दात राष्ट्रवादी काँग्रेसचे ज्येष्ठ नेते विनायक मेटे यांनी भाषणाच्या प्रारंभी गडकरी यांच्या कार्य कर्तृत्वाचे गोडवे गायले. गडकरी स्वतच्या कर्तृत्वाने पुढे आले आहेत त्यामुळे जनता त्यांच्या पाठीमागे राहील आणि एक दिल्लीचा गड ते पार करतील असा विश्वास आहे. गडकरी यांच्या विरोधात कोणी कितीही षडयंत्र रचण्याचा प्रयत्न केला तरी त्यांची लढण्याची वृत्ती आहे आणि ती कायमस्वरुपी राहणार आहे, असा विश्वास मेटे यांनी व्यक्त करून गडकरी यांच्या लढाऊ वृत्तीचे कौतुक केले.
करिष्माच्या चाहत्यांची निराशा
निर्मल नगरीच्या उद्घाटनासाठी अभिनेत्री करिष्मा कपूर येणार असल्यामुळे तिच्या चाहत्यांनी उद्घाटन कार्यक्रमासाठी मोठय़ा प्रमाणात गर्दी केली होती. परिसरातील हौसे नवसे करिष्मा कपूरची एक झलक पाहण्यासाठी आतुर होते. परिसरात सुरक्षा व्यवस्था करण्यात आली होती मात्र उद्घाटनच्या वेळी करिश्मा कपूर येणार नसल्याचे जाहीर करण्यात आल्यावर अनेक चाहत्यांची निराशा झाली. कार्यक्रम सुरू असताना अनेक करिष्मा चाहत्यांनी काढता पाय घेतला.
