तीन महिन्यांत तडे गेलेल्या काँक्रीट रस्त्यांच्या चौकशीची मागणी

कल्याण पूर्व भागातील नेतिवली नाका ते श्रीमलंग या सिमेंट काँक्रीटच्या रस्त्याला तीन महिन्यांतच तडे गेल्याने खळबळ उडाली आहे. १८ कोटी रुपये खर्चाचे हे काम आहे. या कामाचे वृत्त प्रसिद्ध होताच झोपी गेलेल्या विविध पक्षांच्या राजकीय पदाधिकाऱ्यांनी पालिका आयुक्तांना पत्र देऊन या रस्ते कामाची चौकशी करण्याची मागणी केली आहे.
नेतिवली नाका ते श्रीमलंग या १४८० मीटर रस्त्याचे काँक्रीटीकरणाचे काम गेल्या तीन महिन्यांपूर्वी पूर्ण झाले. हा रस्ता वाहतुकीसाठी खुला करण्यात आला. आता या रस्त्याला मोठय़ा भेगा पडल्या आहेत. तडे गेले आहेत. अशाच प्रकारचे तडे कल्याण पश्चिमेकडील गोल्डन पार्क, मुरबाड वळण रस्त्याला यापूर्वी पडले होते. हे प्रकरण झाकण्यात पालिकेच्या प्रकल्प विभागाच्या अभियंत्यांना यश आले. या कामांवर, अभियंत्यांवर त्यांचा वचक न राहिल्याने सिमेंट काँक्रीटच्या रस्त्यांची दुरवस्था झाल्याची टीका आता नगरसेवक, पदाधिकाऱ्यांकडून करण्यात येत आहे. या प्रकल्पाचे अभियंता प्रमोद कुलकर्णी यांच्यावर कठोर कारवाई केल्याशिवाय पाणीपुरवठा, काँक्रीटीकरणाची कामे शिस्तीत व वेळेत पूर्ण होणार नाहीत, अशीही अनेक नगरसेवकांची मागणी आहे.  डोंबिवलीत घरडा सर्कल, रामनगर, गांधी रस्ता भागात काँक्रीट रस्त्यांची कामे पूर्ण करण्यात आली आहेत. या रस्त्यांच्या कामांविषयी नगरसेवकांनी संशय व्यक्त केला आहे. महात्मा गांधी रस्ता भागात फक्त कामे उरकण्यासाठी घाईने काँक्रीटीकरणाचे काम सुरू असल्याचे नागरिकांकडून सांगण्यात येते. निकृष्ट दर्जाची कामे करणाऱ्या ठेकेदारांना कामाचे देयक देऊ नये व त्यांना काळ्या यादीत टाकण्याची मागणी पदाधिकाऱ्यांनी केली आहे.