अशी ही ‘बनवाबनवी’

रुमालात पाचशे रुपयांच्या नोटेखाली वहीची कोरी पाने ठेवत ते दोन लाख रुपये असल्याचे भासवून भामटय़ांनी एकास ७० हजार रुपयांना गंडा घातल्याचा प्रकार उघडकीस आला. फसवणुकीचे प्रकार अव्याहतपणे सुरू असून दुसऱ्या घटनेत टाकळी रस्त्यावर पोलीस असल्याचे भासवून एका महिलेकडून सोन्याच्या बांगडय़ा लंपास करण्याचा प्रकार घडला. बनावट दस्तावेजाद्वारे पिंपळगाव बहुला शिवारातील भूखंडाची चार संशयितांनी विक्री करत फसवणूक केल्याप्रकरणी नाशिकरोड पोलीस ठाण्यात गुन्हा दाखल झाला आहे. अमृतधाम परिसरात वास्तव्यास असलेले विजय गावंडे यांना सोमवारी दुपारी नेहरू  उद्यानासमोरील इलाहाबाद बँकेत दोन संशयितांनी गाठले. त्यांच्याकडे ७० हजार रुपयांची रोकड होती. त्यात १०००, ५०० व १०० रुपयांच्या नोटांचा समावेश होता. या वेळी संशयितांनी त्यांना आपल्याकडे ५०० रुपयांच्या नोटांचे दोन लाखांचे बंडल असल्याचे सांगून गावंडे यांच्याकडील ७० हजार रुपये घेतले. या वेळी संशयितांनी त्यांच्याकडील रुमालात बांधलेली रक्कम गावंडे यांना स्वाधीन केली. दरम्यानच्या काळात संशयित निघून गेले. रुमालातील रोकड पाहताना त्यात ५०० रुपयांची केवळ एकच नोट आणि त्याखाली वहीची कोरी पाने ठेवल्याचे निदर्शनास आले. या घटनेत आपली ७० हजार रुपयांना फसवणूक झाल्याची तक्रार गावंडे यांनी भद्रकाली पोलीस ठाण्यात दिली.

फसवणुकीचा दुसरा प्रकार टाकळी रस्त्यावर घडला. पोलीस असल्याचे भासवून फसवणुकीचे प्रकार वारंवार घडत असूनही महिला वर्ग त्यातून काही बोध घेत नसल्याचे दिसते. टाकळी रस्त्यावरील इच्छामणी गिरणीसमोरून सुझेन जॉनसन (५५) या घरी पायी जात असताना दोन संशयित दुचाकीवरून आले. आदल्या दिवशी या ठिकाणी एका महिलेचा खून झाला होता, असे सांगून संशयितांनी आपण पोलीस असल्याचे भासवत जॉनसन यांना हातातील बांगडय़ा पर्समध्ये ठेवण्यास सांगितले. जॉनसन बांगडय़ा पर्समध्ये ठेवत असताना संशयितांनी त्या लंपास केल्या. या प्रकरणी उपनगर पोलीस ठाण्यात गुन्हा दाखल करण्यात आला आहे. बनावट दस्तावेजाद्वारे भूखंडाची विक्री करण्यात आल्याची तक्रार नाशिकरोड पोलीस ठाण्यात चारुलता चौधरी यांनी दिली. पिंपळगाव बहुला शिवारात गट क्रमांक अमधील ७३ क्रमांकाच्या आपल्या भूखंडाची संशयितांनी परस्पर खरेदी-विक्री केली. त्यासाठी बनावट पॅनकार्ड व मतदान कार्ड तयार केले आणि ते खरे असल्याचे भासवून उपरोक्त भूखंडाचे दस्त दुय्यक निबंधक कार्यालयात नोंदविण्यात आले. त्यावर बनावट स्वाक्षरी करून शासनाची फसवणूक करण्यात आल्याचे चौधरी यांनी म्हटले आहे. या प्रकरणी भारत ठोके, हंसराज विश्वकर्मा, आदित्य मेहंदळे व अमोल मुर्तडक यांच्याविरुद्ध गुन्हा दाखल करण्यात आला आहे.