गॅस सिलिंडरची अवैध वाहतूक, वाहन जप्त

विनापरवाना घरगुती गॅसची वाहतूक करणारा अ‍ॅपे शहर पोलिसांनी खामगांव येथील हॉटेल गौरवसमोर पकडला आहे. याप्रकरणी अ‍ॅपेचालकाला अटक करून अ‍ॅपेसह साडेपाच लाखाचा माल जप्त केला आहे. यामध्ये ९ सिलेंडरचाही समावेश आहे.
पिंपळगांव राजा, तालुका खामगांव येथील संजय काशिराम चोपडे वय ३८ हा विना नंबरच्या पिवळया रंगाच्या अ‍ॅपेमध्ये भरलेले ४ व खाली ५ असे ९ घरगुती सिलेंडर घेवून जात असल्याची माहिती शहर पोलिस स्टेशनचे ठाणेदार यु.के.जाधव यांना मिळाली. त्यामुळे त्यांनी पीएसआय कावरे व पोलिस जमादार जायभाये, एएसआय इंगळे, सुरेद्रसिंग चव्हाण, तौर आदीच्या माध्यमातून सापळा रचला त्यावेळी सदर अ‍ॅपेत हॉटेल गौरव, नांदुरा रोड येथे येताच ताब्यात घेण्यात आले. त्यावेळी अ‍ॅटोत ४ भरलेले व ५ खाली असे सिलींडर मिळून आले. त्यामुळे पोलिसांनी आरोपी संजय चोपडे विरूध्द जीवनावश्यक कायद्यान्वये गुन्हा दाखल केला आहे व त्याच्या ताब्यातील अ‍ॅपे ४ लाख रूपये, रिकामे व भरलेले गॅस सिलेंडर किंमत ८३ हजार रूपयाचा माल जप्त केला आहे. अधिक तपास पीएसआय कावरे करीत आहेत.