विदर्भात दशकातील पावसाचा उच्चांक

सरासरीपेक्षा ५० टक्के अधिक पाऊस
विदर्भासाठी मान्सून आतापर्यंत चांगलाच अनुकूल ठरला असून १० जुलैअखेर विदर्भात सरासरीपेक्षा ५० टक्के जास्त पाऊस झाला आहे. गेल्या वर्षी या कालावधीत सरासरीच्या केवळ ७६ टक्के पावसाची नोंद झाली होती. गेल्या दशकभरातला हा उच्चांक ठरला आहे. संपूर्ण विदर्भात सरासरी ४७१.५ मि.मी. पावसाची नोंद विविध भागातील पर्जन्यमापकांवर झाली आहे. हा पाऊस सरासरीच्या १५४ टक्के आहे.
मान्सूनचे आगमन वेळेत झाल्यानंतर विदर्भात सर्वदूर दमदार पाऊस बरसला. जमीन भुसभुशीत झाल्यानंतर शेतकऱ्यांनी पेरण्यांच्या कामांना सुरुवात केली. काही भागात तर उघाड न मिळाल्याने पेरण्या लांबत गेल्या. पण, आता भाताची लागवड वगळता इतर सर्व पिकांच्या पेरण्या जवळपास आटोपल्या आहेत.
विदर्भात जूनअखेपर्यंत पावसाने सरासरी ओलांडली होती. अनेक जिल्ह्य़ांमध्ये तर सरासरीच्या दोनशे टक्क्यांपर्यंत पावसाचा जोर पोहोचला होता. गेल्या काही दिवसांमध्ये विदर्भात बहुतांश ठिकाणी हलका ते मध्यम स्वरूपाचा पाऊस सुरू आहे. काही ठिकाणी मुसळधार पाऊस बरसला. अनेक सिंचन प्रकल्पांच्या पाणलोट क्षेत्रामध्ये झालेल्या दमदार पावसामुळे जलसंचय पातळी देखील झपाटय़ाने वाढली.
विदर्भात आतापर्यंत सर्वाधिक पावसाची नोंद वाशीम जिल्ह्य़ात झाली. या ठिकाणी सरासरीच्या २०८ टक्के पाऊस झाला आहे. वाशीम जिल्ह्य़ात जुलैच्या मध्यापर्यंत २४७ मि.मी. पाऊस येतो. तो यंदा ५१५ मि.मी. इतका बरसला आहे. विदर्भातील सर्वच जिल्ह्य़ांची हीच परिस्थिती आहे. गेल्या वर्षी बुलढाणा जिल्ह्य़ात पावसाची सर्वाधिक तूट होती. जुलैच्या मध्यापर्यंत बुलढाणा जिल्ह्य़ात सरासरीच्या ९० टक्के पाऊस झाला खरा, पण नंतर पावसाने खंड दिला आणि दुष्काळी परिस्थिती उद्भवली. अकोला जिल्ह्य़ातील काही भागालाही फटका बसला होता. पण, यंदाच्या पावसाळ्यात आतापर्यंत तरी अकोला आणि बुलढाणा या जिल्ह्य़ांमध्ये समाधानकारक पावसाची स्थिती आहे. अकोला जिल्ह्य़ात ३५५ मि.मी. (१६९ टक्के), तर बुलढाणा जिल्ह्य़ात ३२८ मि.मी. (१५८ टक्के) पावसाची नोंद झाली आहे. आतापर्यंत विदर्भात वर्धा जिल्ह्य़ात सर्वात कमी पावसाची नोंद झाली असली तरी प्रत्यक्षात ४१८ मि.मी. म्हणजे सरासरीच्या १५२ टक्के इतका हा पाऊस आहे.