आयुक्तांना चोरांची सलामी..

खारफुटीही असुरक्षित
मुंब्रा, दिवा खाडी किनारा जिल्हाधिकारी पी. वेलारासू यांच्या नियंत्रणाखाली असला तरी या खाडी किनारी मुंब्रा येथे पोलिसांची चौकी आहे. या चौकीच्या समोरील भागात वाळूमाफिया खारफुटीची झाडे तोडून दररोज वाळूचा उपसा करताना दिसतात. याविषयी महसूल विभाग झोपेत असला तरी पोलिसांनाही या बेकायदा खारफुटीच्या कत्तलेविषयी काही घेणेदेणे नसल्याचे चित्र आहे. मुंब्रा, दिव्यातील वाळूमाफियांकडे कानाडोळा करत या भागातील गैरधंद्यांना पोलिसांनी एकप्रकारे आशीर्वाद दिल्याची चर्चाही रंगली आहे. तत्कालीन आयुक्त के.पी. रघुवंशी आयुक्तपदी असताना त्यांनी काही काळ वाळूमाफियांना वेसण घातली होती. कांबळे यांच्या काळात पोलिसांच्या चौकीमागेच बिनधोकपणे वाळू उपसा सुरू असल्याचे चित्र दिसत आहे.

कांबळेंच्या कार्यपद्धतीवर निशाणा
विद्यमान आयुक्त विजय कांबळे यांनी ठाणे पोलीस आयुक्तालय क्षेत्रात यापूर्वी काम केले आहे. त्यामुळे आयुक्त म्हणून पदभार स्वीकारल्यानंतर ते चोरी, दरोडय़ाच्या घटना रोखण्यास प्रभावी उपाययोजना करतील अशी नागरिक तसेच व्यापाऱ्यांची अटकळ होती. मात्र, चोर-दरोडेखोरांनी अक्षरश उच्छाद मांडत आयुक्तांच्या कार्यपद्धतीवर निशाणा साधल्याची चर्चा सध्या रंगली आहे. मागील १५ दिवसांत ठाण्यातील समतानगर, वर्तकनगर, नौपाडा भागात जवाहिऱ्यांची दुकाने फोडण्याचे प्रकार घडून लाखो रुपयांचा ऐवज लुटून नेण्यात आला आहे. जांभळीनाका येथे एका व्यापाऱ्याला बेदम मारहाण करून लुटण्यात आले. डोंबिवलीत कस्तुरी प्लाझा या मध्यवर्ती भागात असलेल्या एका जवाहिऱ्याचे दुकान दिवसाढवळ्या लुटून नेण्यात आले. कल्याणमधील रोहन गुच्छेत या बालकाचे अपहरण तसेच हत्याप्रकरण पोलिसांनी अतिशय ढिसाळपणे हाताळले. याप्रकरणी दोन पोलीस कर्मचाऱ्यांना निलंबित करण्याची वेळ आयुक्तांवर आली. ठाण्यात रस्त्याने चालणाऱ्या महिलांच्या गळ्यातल्या सोनसाखळ्या चोरणे हा तर चोरांचा धंदाच बनला आहे. एकाच दिवशी सात महिलांच्या सोनसाखळ्या चोरून चोरांनी पोलिसांपुढे मोठे आव्हान उभे केले आहे. सूत्रांकडून मिळालेल्या माहितीनुसार संपूर्ण पोलीस आयुक्तालय क्षेत्रात  सोनसाखळी चोरीच्या दररोज किमान सात ते आठ घटना घडत आहेत. यामधील बहुतांशी चोर हे भिवंडी परिसरातील असल्याचे पोलीस तपासात उघड झाले आहे. हे भुरटे चोर नंतर सुटतात आणि पुन्हा चोरीमारी सुरू करतात, असे पोलीस सूत्रांनी सांगितले.