पंढरपुरातून चालकाला धाक दाखवून मोटार पळविली

भाडे ठरवून प्रवासासाठी घेतलेली इंडिका कार पंढरपुरात आल्यानंतर तिघाजणांनी कारचालकाला चाकूचा धाक दाखवून व त्याचे हातपाय बांधून त्याच्या ताब्यातून कार व इतर ऐवज बळजबरीने पळवून नेल्याची घटना पंढरपुरात गोपाळपूर येथे घडली.
मदन पांडुरंग साळुंखे (वय २७, रा. सोनखेड, ता. निलंगा, जि. लातूर) असे लुटण्यात आलेल्या कारचालकाचे नाव आहे. तिघा तरुणांनी पंढरपूरला जाण्यासाठी म्हणून साळुंखे याच्या ताब्यातील इंडिका कार भाडय़ाने ठरविली. पंढरपुरात आल्यानंतर गोपाळपूर येथे अचानकपणे कारमध्ये प्रवासी म्हणून बसलेल्या तिघा तरुणांनी पवित्रा बदलत चालक साळुंखे यास चाकूचा धाक दाखवत त्यास कारमधून खाली उतरविले व त्याच्या ताब्यातील रोख रक्कम तसेच मोबाइल आदी ऐवज बळजबरीने काढून घेतला. नंतर चोरटय़ांनी त्याचे हाय-पाय बांधले व तोंडाला चिकटपट्टीही लावली. त्यास रस्त्यावर टाकून देत चोरटे कार घेऊन पसार झाले. पंढरपूर तालुका पोलीस ठाण्यात या गुन्हय़ाची  नोंद झाली आहे.