रेल्वेच्या प्रश्नांवर राज्यस्तरीय संघर्ष समिती हवी – डोईफोडे

राज्यातील रेल्वेचे प्रश्न एकत्रितपणे मांडण्यास महाराष्ट्रव्यापी रेल्वे संघर्ष समिती नाही. ती गठीत करण्याची गरज आहे. तसे न झाल्याने प्रत्येकजण वेगवेगळ्या लढाया करतो आणि पराभूत होतो, अशी खंत ज्येष्ठ पत्रकार सुधाकर डोईफोडे यांनी व्यक्त केली. सोलापूर-जळगाव रेल्वेमार्ग औरंगाबादला जोडणे योग्य असल्याचे मतही त्यांनी व्यक्त केले. तसे केल्याने पैठण, वेरुळ ही ऐतिहासिक स्थळेही दक्षिणेला जोडणे सोयीचे होईल.
राज्यात अर्थसंकल्पापूर्वी प्रत्येकजण वेगवेगळी मागणी करतो. वास्तविक, मागण्यांचा साकल्याने विचार करून एकच मागणी केली तर त्याचा परिणाम होऊ शकतो. नाशिकमधील एक गट नाशिक-पुणे अशी मागणी करतो व दुसरा गट नाशिक-डहाणू अशा मार्गाची मागणी करतो. नक्की काय मागायचे आहे, हे ठरत नाही. परळी-बीड-नगर-माळशेज अशी मागणी केली असती तर अधिक फायदा झाला असता. मात्र, सर्वजण वेगवेगळ्या लढाया करतात, पराभूत होतात. त्यामुळे रेल्वे संदर्भातील मागण्या करताना राज्यपातळीवर संघटना उभी राहावी, असे ते म्हणाले.