महिलेवर बलात्कार; भोंदूबाबाला अटक

महिलेवर बलात्कार केल्याप्रकरणी बानगे (ता.कागल) येथील भोंदूबाबाला सोमवारी कागल येथील न्यायालयाने सात दिवस पोलीस कोठडीत ठेवण्याचा आदेश दिला. शंकर दादू निंगुरे उर्फ आवळीकर मामा असे या भोंदूबाबाचे नाव आहे.     
तीन मुली असलेल्या एका विवाहित महिलेला मुलगा व्हावा, यासाठी पतीचे प्रयत्न सुरू होते. त्यासाठी नवससायास केले जात होते. या महिलेला बानगे येथील आवळीकर मामाकडे जाण्याचा सल्ला देण्यात आला होता. मंत्रतंत्राच्या आधारे तो पुत्र प्राप्ती करून देतो, असे या महिलेला सांगितले होते. त्यानुसार मार्गशीर्ष महिन्यातील तिसऱ्या गुरुवारी संबंधित महिला पती व शेजाऱ्यासह आवळीकर मामा यांच्या घरी गेली होती. गर्दी असल्याने त्याने महिलेला आतील खोलीत जाण्यास सांगितले होते. थोडावेळाने महाराज त्या खोलीत गेला. काठीने रिंगण काढून महिलेला त्यामध्ये बसण्यास सांगितले.
महिलेचा दीर मृत झालेला होता. त्याची शांती करण्याची गरज असल्याचे सांगून महाराजांनी तिला पुढच्या गुरुवारी येण्यास सांगितले होते. पुढील गुरुवारी महिला आल्यावर भोंदूबाबाने कपाळाला भंडारा लावला व भंडारा असलेले पाणी पिण्यास सांगितले. पतीला खालच्या खोलीत बसण्यास सांगून विवाहितेला वरच्या खोलीत नेले. तेथे महिलेला लज्जा उत्पन्न होईल, असे वर्तन केले. त्यानंतर तीन-चार वेळा बोलावून घेऊन असेच वर्तन केले. तर २४ जानेवारीला भोंदूबाबाने विवाहितेला घरामागील गोठय़ात नेऊन बलात्कार केला. या प्रकारामुळे घाबरलेली विवाहिता गप्प बसली. मात्र दुसऱ्या दिवशी घडलेला प्रसंग तिने कुटुंबीयांना सांगितला.    
त्यानंतर विवाहितेने कागल पोलीस ठाण्यामध्ये शंकर निंगुरे (वय ७७) या भोंदूबाबा विरुध्द तक्रार नोंदविली. कागल पोलीस ठाण्याचे निरीक्षक रमेश बनकर यांनी गुन्हा दाखल केल्यानंतर भोंदूबाबाला अटक केली. त्याला तपासासाठी बानगे गावात फिरविण्यात आले. सात दिवसांची पोलीस कोठडी मिळाल्यामुळे भोंदूबाबाचे अनेक गैरप्रकार उघडकीस येण्याची शक्यता आहे.