राज व उद्धव एकत्र येणे हीच बाळासाहेबांना श्रद्धांजली- पानसरे

बाळासाहेबांविषयी कृतज्ञता व्यक्त करतानाच बाबरांनी आपला जीवनपटही उलगडला. सातवी पास, काम ना धंदा. मुंबईत मामाची हातगाडी ओढत होतो. एका व्यापाऱ्याकडे काम मागितले. त्याने घाटी असल्याचे कारण देत हाकलून दिले. तेव्हाच मुंबई सोडली व सातारा गाठले. तेथून पुण्याला आलो व भवानी पेठेत रेशनच्या दुकानात काम केले. तेथे ‘मार्मिक’ मध्ये मराठी माणसांवर होत असलेला अन्याय सतत वाचनात येत होता. त्यातून बाळासाहेबांकडे आकृष्ट झालो. त्यांच्याकडे दैवी शक्ती होती. त्यांच्या आशीर्वादाने नगरसेवक, आमदार व खासदार झालो. बाळासाहेब म्हणजे दूरदृष्टी असणारा नेता, असे आढळराव म्हणाले. पानसरे म्हणाले,‘‘ राज व उद्धव यांनी एकत्रितपणे महाराष्ट्रात काम केले पाहिजे. बाळासाहेबांची तशीच इच्छा होती. ते एकाच पक्षात एकत्र राहणे, हीच बाळासाहेबांना खऱ्या अर्थाने श्रध्दांजली ठरेल.’’
‘साहेबांपेक्षा कार्यकर्त्यांची मालमत्ता जास्त’
बाळासाहेब ठाकरे यांनी कधीही पदाची अपेक्षा ठेवली नाही. पैशाचा हव्यास बाळगला नाही. साहेबांपेक्षा त्यांच्या कार्यकर्त्यांकडे कितीतरी पटीने अधिक मालमत्ता आहे, अशी टिप्पणी खासदार गजानन बाबर यांनी केली. हे विधान कोणाला उद्देशून केले, ते मात्र गुलदस्त्यात राहिले. विरोधी पक्षात कशाला राहतो, असे म्हणत रंगनाथ फुगे काँग्रेसमध्ये बोलवत होते. तर, तुला महापौर करतो, असे गाजर नाना शितोळे दाखवत होते. मात्र, निष्ठेने बाळासाहेबांकडे राहिलो, त्याचेच फळ मिळत गेले, असेही ते म्हणाले. शिवसेनेला ठाण्या-मुंबईत सत्ता मिळाली. मात्र, पुणे-िपपरीत मिळू शकली नाही, अशी खंतही व्यक्त केली.